У Верхнядзвінску судзяць хлопца, які параніў двух міліцыянтаў
Суд над хлопцам у Верхнядзвінску праходзіць без агалоскі
У судзе Верхнядзвінскага раёна разглядаецца справа Глеба Ц., 18-гадовага жыхара Смаргоні, які 1 студзеня 2020 года напаў на пастарунак у Верхнядзвінску і параніў двух міліцыянтаў. Інфармацыі пра працэс мала — знаёмыя Ц. кажуць, што вакол справы ўтварыўся вакуум.
— Ідзе судовае разбіральніцтва, справа ў працэсе разгляду. Калі вас цікавяць нейкія пытанні — сваякі ведаюць усю інфармацыю, — распавядае Еўрарадыё старшыня Верхнядзвінскага суда Людміла Каваленка.
Сваякі Глеба на кантакт са СМІ не ідуць. Тата хлопца, прадпрымальнік са Смаргоні, на званкі не адказвае. Мама і зусім абарвала ўсе ранейшыя кантакты.
— Яна змяніла нумар, месца жыхарства, не кантактуе ні з кім. Нават з суседкай, з якой была вельмі дружнай, — расказвае пра маці Глеба Ц. яго былая настаўніца. — Яе няма ў Смаргоні. Яна і раней працавала ў школе Маладзечанскага раёна. Магчыма, там яе бацькі і яна жыве ў іх.
Я не разумею такой засакрэчанасці ад людзей, якія шчыра перажываюць за Глеба. Параноя нейкая. Вы ж бачыце, як хутка гэтую справу звялі на нуль. Хоць адразу і міністэрства, і ўсе на свеце лезлі. А потым — вакуум...
Паводле версіі сілавікоў, Глеб Ц. 1 студзеня 2020 года напаў на Верхнядзвінскі РАУС. Ён кінуў дзве бутэлькі з гаручай вадкасцю ў будынак Дэпартамента аховы (падпаліць яго ў хлопца не атрымалася), а потым напаў з нажом на двух міліцыянтаў, якіх сам жа і выклікаў сябе затрымаць.
Ц. была прызначаная псіхолага-псіхіятрычная экспертыза. Да нядаўніх часоў нават тыя, хто цесна з ім кантактаваў, думалі, што ён праходзіць лячэнне.
Незадоўга да нападу Глеб быў адлічаны з Полацкага ўніверсітэта. Афіцыйна — за рэгулярную адсутнасць на занятках. Пасля гэтага хлопец запісаў маніфест (яго да гэтага часу можна прачытаць у яго тэлеграм-канале). Тэкст радыкальны — там пра легалізацыю прастытуцыі, наркотыкаў і гладыятарскіх баёў, кастрацыю злачынцаў, стварэнне касты "прывілеяваных грамадзян". На злачынства яго штурхнулі адсутнасць аднадумцаў і расчараванне ў навакольным свеце.
Еўрарадыё працягвае сачыць за працэсам Глеба Ц.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
