Украіна: ФСБ абвінавачвае Беларусь у зрыве паставак ваеннай тэхнікі
Беларускі бронеаўтамабіль, створаны на МЗКТ / Mil.ru
Куратары з ФСБ незадаволеныя тым, як працуюць беларускія прадпрыемствы ваенна-прамысловага комплексу, піша ўкраінскі Цэнтр нацыянальнага супраціву.
Кіраўнікоў беларускіх прадпрыемстваў у Расіі абвінавачваюць у зрыве паставак аплачанай тэхнікі.
"Так, беларускаму КДБ зрабілі заўвагі па адгрузцы прадукцыі беларускага ВПК партнёрам з Ірана. Гаворка ідзе аб мадэрнізаваных элементах РСЗА, асобных запчастках да БПЛА, элементах аўтаматызаваных сістэм кіравання і сродках радыёэлектроннага падаўлення", — гаворыцца на сайце цэнтра.
Паводле звестак украінскага боку, у Расіі незадаволеныя такой расстаноўкай прыярытэтаў і патрабуюць пачаць ціск на кіраўнікоў беларускіх прадпрыемстваў.
