Улады Германіі называюць памылкай размяшчэнне ў Беларусі ядзернай зброі
Ракетны комплекс "Іскандэр" можа несці ядзерныя зарады / Sputnik/East News
Размяшчэнне на тэрыторыі Беларусі расійскай тактычнай ядзернай зброі (ТЯЗ) — гэта памылковы крок і спроба запалохвання. Такое меркаванне ўрада ФРГ агучыў прадстаўнік Кабміна Вольфганг Бюхнер.
"Перамяшчэнне ТЯЗ у Беларусь, якое зацвярджаецца Лукашэнкам, з'яўляецца відавочнай чарговай спробай ядзернага запалохвання з боку Расіі. Мы яе рашуча адпрэчваем", — цытуе ТАСС словы нямецкага чыноўніка.
Бюхнер падкрэсліў, што Беларусь "супярэчыць сваім заявам пра тое, што будзе свабоднай ад атамнай зброі", а Расія — абяцанням не размяшчаць такую зброю па-за сваёй тэрыторыяй.
Як распавядала Еўрарадыё, 25 траўня міністры абароны Беларусі і Расіі Віктар Хрэнін і Сяргей Шайгу падпісалі дакументы пра размяшчэнне ў Беларусі расійская ядзернай зброі. Пры гэтым Шайгу падкрэсліў, што кантроль за гэтай зброяй будзе цалкам у руках Расіі.
Пасля гэтага Аляксандр Лукашэнка заявіў, што расійскую ядзерную зброю пачалі перамяшчаць у Беларусь.
