Увесну 2020 года ў Беларусь нарэшце прыйдуць лоўкосты
Увесну 2020 года венгерская авіякампанія Wizz Air адкрые рэйс Будапешт-Мінск. Пра гэта агенцтву БЕЛТА распавёў дырэктар Дэпартамента па авіяцыі Міністэрства транспарту і камунікацый Беларусі Арцём Сікорскі.
Па яго словах, цяпер вядзецца праца па ўзгадненні і падпісанні адпаведных дакументаў. Авіяцыйныя ўлады Беларусі ўзгаднілі частату палётаў з расійскімі калегамі на сезон IATA восень-зіма 2019-2020. Яна застанецца ранейшай — 63 рэйсы ў тыдзень для кожнага з партнёраў.
Wizz Air — гэта першая лоўкост-кампанія, якая прыходзіць на беларускі рынак. Гэта венгерская авіякампанія, адна з найбуйнейшых у свеце. Яна працуе пераважна ў Цэнтральнай Еўропе.
Раней кампанія "Белаэранавігацыя" вяла перамовы з аператарам AirBaltic наконт таго, каб адкрыць рэйсы з аэрапорта ў Гродне. Аднак, на думку экспертаў, гэта быў не лепшы варыянт для пачатку супрацоўніцтва Беларусі і лоўкост-кампаній.
