Ва ўкраінскай школьнай праграме пакінулі толькі аднаго беларускага аўтара
Мінадукацыі Украіны прыбрала з навучальных праграм творы беларускіх і расійскіх пісьменнікаў. Пакінулі толькі творы ўраджэнцаў украінскай зямлі. Новаўвядзенне тлумачыцца адказам на выклікі, якія ўзніклі пасля пачатку агрэсіі Расіі. Міністэрства піша, што ў праграмы дадалі творы іншых замежных пісьменнікаў (не расійскіх і не беларускіх).
Пра тое, што з украінскай школьнай праграмы выкрэсліваюць творы Васіля Быкава (вучні сёмых класаў чыталі ягоную "Альпійскую баладу" ў рамках "Замежнай літаратуры"), стала вядома ў чэрвені сёлета. Як піша кіраўнік Беларускай рады культуры Сяргей Будкін, прыбралі і вершы Янкі Купалы.
У выніку рэформы "застаўся толькі адзін беларускі аўтар — Сяргей Законнікаў з вершам "Бережи себе, Україно!" — з творам для дадатковага чытання ў 10-11 класах з філалагічным профілем. Законнікаў нарадзіўся ў 1946-м у Бешанковіцкім раёне. Ён — паэт, публіцыст, грамадскі дзеяч. У 1986-2002 гадах быў галоўным рэдактарам часопіса "Полымя". Лаўрэат дзяржаўнай прэміі імя Янкі Купалы (1992). Перакладаў на беларускую мову творы ўкраінскіх паэтаў.
Беларуская рада культуры "пры падтрымцы Палка Каліноўскага" звярталася ў Міністэрства адукацыі і навукі Украіны з нагоды планаў прыбраць з праграмаў беларускіх аўтараў. "На жаль, пакуль дыялогу не атрымалася і адстаяць усіх беларускіх аўтараў не ўдалося", — піша Будкін.
