Вельмі эканомная японка і разбіты старажытны артэфакт — #ІхНоравы

28/08/2024 - 16:27

Міжнародныя навіны / @rubanau_collage

Аказваецца, калі траціць на ежу ўсяго паўтара долара на дзень, а адзежу браць у сваякоў, то да 37 гадоў можна назбіраць грошай на тры дамы, а за рэшту яшчэ адкрыць і котакавярню. Так зрабіла адна вельмі эканомная японка. Пра гэта і не толькі чытайце ў нашым штодзённым аглядзе міжнародных навін.

Хлопчык у Ізраілі прыйшоў у музей і разбіў вельмі-вельмі старую вазу

Чатырохгадовы хлопчык разам з бацькамі прыйшоў у ізраільскі музей Хехта і выпадкова разбіў пасудзіну, якая датуецца познім бронзавым векам, каля 3,5 тысяч гадоў таму, паведамляе ВВС.

Экспазіцыя не мела ніякай аховы. Тата хлопчыка расказаў, што ягоны сын "злёгку пацягнуў" пасудзіну на сябе, каб паглядзець, што знаходзіцца ўнутры. Урэшце старажытная амфара ўпала і разбілася.

Спачатку бацькі не паверылі, што гэта зрабіў іх сын, а пасля пагаварылі з прадстаўнікамі музея. Тыя паабяцалі не выстаўляць ніякіх прэтэнзій і зноў запрасілі сям'ю на экскурсію.

У музеі патлумачылі такое рашэнне тым, што дзіця разбіла пасудзіну выпадкова. Супрацоўнікі ўстановы ўжо прызначылі спецыяліста, які зоймецца аднаўленнем экспаната.

Ліхаманка Заходняга Ніла атакуе Еўропу

У іспанскай Севільі зафіксавалі два новыя выпадкі смерці ад ліхаманкі Заходняга Ніла, піша Euronews.

Агульная колькасць ахвяр дасягнула пяці чалавек за лета. Раней мясцовыя ўлады паведамлялі, што выявілі дзесяць выпадкаў заражэння вірусам.

Камароў-пераносчыкаў віруса выявілі ў некалькіх раёнах уздоўж ракі Гвадалквівір. У аптэках вешаюць плакаты з лозунгам "Не аблягчайце жыццё камарам!" і парадамі аб тым, як пазбегнуць заражэння.

Мясцовыя жыхары нават выходзілі на акцыі пратэсту, патрабуючы ад уладаў прыняць эфектыўныя меры.

Паводле звестак Еўрапейскага цэнтра прафілактыкі і кантролю захворванняў, з пачатку года вірусам Заходняга Ніла ў Еўропе заразілася каля 80 жыхароў дзевяці еўрапейскіх краін. Больш за ўсё — у Грэцыі і Італіі.

СААЗ сцвярджае, што ў 80% выпадкаў заражэнне працякае бессімптомна. Але прыкладна ў адным выпадку са ста наступствы могуць быць вельмі цяжкімі, уключаючы менінгаэнцэфаліт — запаленне абалонак спіннога мозгу.

Ад экстрэмальнай спёкі ў Еўропе мацней за ўсіх церпяць бедныя слаі насельніцтва

Даследаванне, праведзенае ў Мадрыдзе, паказала, што людзі з прыбыткам, ніжэйшым за сярэдні, часцей паміраюць падчас анамальнай спёкі. За апошнія гады высокая тэмпература ў Еўропе забіла дзясяткі тысяч чалавек.

Праца навукоўцаў, апублікаваная ў 2020 годзе, паказала, што хвалі цяпла паўплывалі толькі на самыя бедныя раёны Мадрыда. Тое ж самае адбывалася па ўсёй Іспаніі.

Людзі з нізкімі даходамі часта маюць цяжкасці з доступам да якаснага жылля, многія жывуць у перапоўненых дамах, якія дрэнна праветрываюцца і не даюць магчымасці адпачыць ад спёкі, а некаторыя маюць цяжкасці з доступам да адэкватнага медыцынскага абслугоўвання.

Апошнімі гадамі ў Еўропе стала гарачэй. 2023-і стаў самым гарачым годам за ўсю гісторыю назіранняў. Навукоўцы чакаюць, што 2024 год неўзабаве зойме яго месца.

Эканомная японка да 37 гадоў купіла тры дамы і адкрыла котакавярню

Жыхарка Японіі Сакі Тамагамі стала "самай ашчадлівай дзяўчынай краіны": з дапамогай эканоміі да 37 гадоў яна здолела купіць тры дамы і адкрыць каціную кавярню, паведамляе South China Morning Post.

У 19 гадоў японка паставіла сабе мэту: да 34 гадоў валодаць трыма дамамі. З тых часоў Сакі траціла на харчаванне ўсяго 200 іен ($1,4) на дзень. Яна старалася гатаваць дома, а таксама выбірала простыя стравы і купляла тавары на зніжцы — напрыклад, тосты і локшыну.

Сакі таксама перастала купляць новае адзенне — брала рэчы ў сваіх сваякоў. А мэблю знаходзіла на звалках.

Асноўны даход японкі — зарплата ад работы агентам у сферы нерухомасці. Жорсткая эканомія і стабільны заробак дазволілі ёй купіць першы дом ужо ў 27 гадоў.

Дзяўчына стала здаваць яго ў арэнду, а дадатковыя даходы траціла на пакрыццё іпатэкі на другі дом. Яго яна купіла ў 29 гадоў.

Неўзабаве пасля гэтага Сакі купіла трэці дом і на яго першым паверсе адкрыла каціную кавярню.