Вярхоўны суд "гатовы абмяркоўваць" зніжэнне тэрмінаў за ўжыванне наркотыкаў
Першы намеснік старшыні Вярхоўнага Суда Валерый Калінковіч распавёў пра сваё стаўленне да зніжэння пакарання па "наркатычным" артыкуле 328 Крымінальнага кодэкса. 31 ліпеня на прэс-канферэнцыі ў Нацыянальным прэс-цэнтры Калінковіч абазначыў гатоўнасць абмяркоўваць зніжэнне пакарання за ўжыванне наркотыкаў.
"Я гатовы абмяркоўваць тэму крымінальнай адказнасці за незаконныя дзеянні з наркатычнымі сродкамі без мэты іх збыту, — сказаў прадстаўнік Вярхоўнага Суда. — Тут крымінальная адказнасць павінна з'яўляцца адным з магчымых інструментаў да таго, каб чалавек пачаў змагацца з хваробай, перамог яе і вярнуўся ў грамадства нармальным".
Пры гэтым Калінковіч не бачыць перадумоў для змякчэння адказнасці за збыт наркатычных сродкаў. "Гэта вельмі небяспечныя злачынствы, фактычна, распаўсюджванне смерці", — сказаў намеснік старшыні Вярхоўнага суда.
Валерый Калінковіч заўважыў, што сёння наркатычныя сродкі на тэрыторыі Беларусі з'яўляюцца аднымі з самых дарагіх у рэгіёне. На яго думку, гэта сведчыць пра тое, што Беларусь эфектыўна процідзейнічае наркагандлю.
"Чым даражэйшая доза, тым цяжэй радавому спажыўцу яе здабыць", — упэўнены Валерый Калінковіч.
Даведка: За 6 месяцаў 2018 гадоў ў Беларусі па "наркатычных" артыкулах Крымінальнага кодэкса было асуджана 1276 чалавек. Гэта на 18% менш, чым у першым паўгоддзі 2017 года. Пры гэтым з 54 да 26 зменшылася колькасць непаўналетніх, асуджаных за незаконны абарот наркатычных сродкаў.
