Як у Кітаі пракаментавалі планы размяшчэння расійскай ядзернай зброі ў Беларусі

У Пекіне прадказальна мякка пракаментавалі планы размяшчэння расійскай ядзернай зброі ў Беларусі. Афіцыйная прадстаўніца МЗС Кітая Маа Нін заявіла, што ў цяперашніх абставінах усім бакам канфлікту мае сэнс спрыяць разрадцы сітуацыі, а не наадварот. Таксама яна нагадала пра сумесную заяву лідараў пяці ядзерных дзяржаў, прынятую ў студзені 2022 года. Там сказана, што ядзерную вайну нельга выйграць. А значыць, трэба пазбягаць войнаў паміж дзяржавамі, што валодаюць ядзернай зброяй.

Пра планы размяшчэння ў Беларусі расійскай тактычнай ядзернай зброі Уладзімір Пуцін заявіў увечары 25 сакавіка. Ён лічыць, што Расія не парушае рэжыму яе нераспаўсюду, паколькі РБ не атрымае кантролю за ядзернымі зарадамі. Захад жа бачыць пагрозу для бяспекі Еўропы і прагназуе новыя санкцыі.