“Ёсць цікавасць і да рэгіёнаў Расіі”. Дзе і як гэтым летам адпачываюць беларусы

25/06/2024 - 10:05

Беларусы / 1proof.by

Ужо канец чэрвеня — перыяд адпачынкаў у разгары. На якія курорты сёлета едуць беларусы, ці ёсць у іх грошы на якасны адпачынак? І, з іншага боку, чаму скарачаецца плынь расійскіх турыстаў у Беларусі?

Пра гэта Еўрарадыё паразмаўляла з прадстаўніком дзяржаўнага сектара туріндустрыі. Яго імя мы не называем з меркаванняў бяспекі.

— Наколькі беларусы ў гэтым сезоне актыўныя ў плане адпачынку?

— Статыстыка будзе пазней, але вось што можна заўважыць ужо цяпер. Калі мы гаворым пра выезд за мяжу, дык турыстычная актыўнасць беларусаў не дасягнула дапандэмійнага ўзроўню. Але з 2021 года гэта кірунак паказвае паступовы рост. Можна меркаваць, што выязных турыстаў з Беларусі ў сезоне 2024 года будзе больш, чым летась, аднак паказчыкі 2019 года застаюцца недасягальнымі.

— Ці ёсць у беларусаў грошы на якасны адпачынак? І колькі яны ў сярэднім гатовыя на яго выдаткаваць?

— Турызм стаў значна даражэйшым. Асабліва калі ехаць з сям'ёй. Аднак патрэба існуе, і людзі не гатовыя адмаўляцца ад мора. Ашчаджаюць, збіраюць грошы. Ёсць растэрміноўкі і крэдыты на туры. У сярэднім за пляжны тур аддаюць 3000 рублёў за чалавека.

— Калі казаць пра напрамак знешняга турызму, куды сёння людзі імкнуцца трапіць? Расія, Заходняя Еўропа, краіны Азіі і Афрыкі? І якія чыннікі ўплываюць на рашэнне?

— Апошнія некалькі гадоў папулярныя кірункі застаюцца без зменаў: Турцыя, Егіпет, ААЭ, Грузія. Гэта адпачынак на моры.

Ёсць цікавасць і да рэгіёнаў Расіі. Яны цікавыя ў плане экскурсійным, прыродным. Дагестан мае добры патэнцыял як кірунак пляжнага адпачынку, з мінулага года туды пачалі ездзіць беларусы. Але ёсць свае істотныя асаблівасці. Гэта і пытанні бяспекі, і недастаткова развітая пляжная інфраструктура.

Галоўныя чыннікі ў выбары туру: даступнасць (транспартная, візавая), цана.

— Наколькі карыстаецца попытам унутраны турызм? Я маю на ўвазе адпачынак на прыродзе, у прыватных сядзібах, у санаторыях.

— Унутраны турызм карыстаецца попытам. Гэты кірунак паказвае ўстойлівы рост з часоў пандэміі. Праз разнастайныя абмежаванні людзі, можа, і вымушана, але звярнулі ўвагу на сваю краіну і яе турыстычныя магчымасці. Многія толькі цяпер для сябе адкрылі, што ў Беларусі ёсць турызм, ёсць розныя варыянты адпачынку. І санаторыі, і аграсядзібы не страчваюць сваіх кліентаў.

Сярод турыстаў на аграсядзібах пераважаюць беларусы, іх цяпер каля 90%. Пераважна гэта сем'і ці кампаніі сяброў. Істотна расце папулярнасць актыўнага адпачынку на прыродзе, а менавіта рачных сплаваў, аднадзённых ці на выхадныя дні. Тая ж Іслач у суботу-нядзелю нагадвае магістраль з актыўным рухам.

Паводле статыстычных звестак, у 2023 годзе колькасць унутраных турыстаў склала 1 млн 759 тысяч чалавек. Гэта, як можна меркаваць, самы высокі ўзровень за ўсю нашу гісторыю. Прынамсі, што можна прасачыць статыстычна. Пры гэтым трэба разумець, што тут улічваецца толькі арганізаваны паток. У рэальнасці ён вышэйшы за кошт індывідуальных турыстаў, але іх пакуль немагчыма падлічыць.

— Наколькі Беларусь цяпер запатрабаваная як месца адпачынку ў расіян?

— Беларусь застаецца прывабным кірункам для расіян, гэта не змянілася. У 2019 годзе іх доля была недзе каля 50% ад агульнай колькасці замежных турыстаў. Сёння, як і ў перыядзе да 2014 года, доля расійскіх турыстаў складае больш за 80%.

Пры гэтым ёсць і пэўныя адрозненні. Праз з'яўленне прамых рэйсаў паміж Мінскам і рознымі регіёнамі Расіі да нас пачалі прыязджаць турысты адтуль, адкуль раней не прыязджалі.

Акрамя таго, праз санкцыйныя абмежаванні ў расіян скараціліся магчымасці выезду, што таксама паўплывала на рост патоку ў Беларусь, якая замяніла ім еўрапейскія краіны. З 2022 года ў Беларусь пачалі прыязджаць віп-турысты з Расіі. Гэтая катэгорыя раней у нас амаль не бывала.

Можна адзначыць, што, паводле звестак расійскай статысткі, у 2023 годзе Беларусь зрабілася краінай, адпачынак у якой падаражэў для расіян найбольш. За год кошт тураў вырас на 37,6%.

— За апошнія чатыры гады беларусы сутыкнуліся з абмежаваннем мабільнасці з розных прычын. Гаворка і пра візавыя абмежаванні, і пра квіткі на пераезды, пералёты, якія істотна падаражэлі. Як гэта змяніла турыстычную сферу Беларусі? І якія яшчэ выклікі перад ёй стаяць?

— Турызм моцна залежны ад вонкавых абставінаў, таму складана рабіць далёкія прагнозы і планы. На сённяшні дзень перспектыўнымі з'яўляюцца азіяцкія краіны, але нават з Кітаем яшчэ не адноўлены дакавідны ўзровень турыстычных стасункаў.

Як бы дзіўна ні прагучала, але ва ўмовах панавання расійскіх турыстаў варта змагацца нават і за іх утрыманне. Рост, які мы назіраем, шмат у чым штучна створаны вонкавымі абставінамі. Ёсць высокая канкурэнцыя з рэгіёнамі Расіі, адкрываюцца новыя выязныя кірункі для расіян, што скарачае колькасць патэнцыйных турыстаў, якія маглі б прыехаць у Беларусь, якая робіцца дарагой для расіян.