За хабар у 10 еўра беларуса аштрафавалі на 6200 еўра
Беларуса аштрафавалі за хабар на мытні / pixabay.com
Латвійская пракуратура аштрафавала грамадзяніна Беларусі на 6200 еўра за хабар у 10 еўра, паведамляе rus.tvnet.lv.
Здарэнне адбылося 24 красавіка. Мужчына заехаў на латвійскі мытна-кантрольны пункт "Сілене", дзе латвійскі мытнік пачаў агляд яго аўтамабіля. Падчас агляду было вырашана накіраваць машыну ў ангар для паглыбленага мытнага кантролю грузу.
Кіроўца даў мытніку дзесяць еўра, каб пазбегнуць паглыбленага мытнага кантролю. За гэта беларуса затрымалі і аштрафавалі на 6200 еўра.
Паведамляецца, што ён цалкам пагадзіўся з велічынёй штрафу і прававой кваліфікацыяй крымінальнага правапарушэння, прызнаў сваю віну і раскаяўся ў зробленым.
