Жыхар аграгарадка "замініраваў" свой населены пункт, а пасля — асобна школу
У Барысаўскім раёне жыхар аграгарадка Лошніца "замініраваў" свой населены пункт. Як інфармуе прэс-служба міліцыі Мінскай вобласці, здарэнне адбылося ў другой палове дня 22 сакавіка. Тэлефанаванне пра "замініраванне" было ў аператыўна-дзяжурную службу барысаўскай міліцыі. У Лошніцу толькі паслалі следча-аператыўную групу, як паступіла новае тэлефанаванне. На гэты раз той жа мужчына заявіў пра "мініраванне" Лошніцкай сярэдняй школы.
Тэрмінова ў Лошніцу прыбылі ўсе аператыўныя службы, міліцыя ачапіла будынак школы, з якога эвакуявалі 120 чалавек. Ніякіх выбуховых прыстасаванняў там не знайшлі. Адначасова была высветленая асоба "тэлефоннага тэрарыста". Ім аказаўся беспрацоўны мясцовы жыхар. 38-гадовы мужчына быў у стане алкагольнага ап'янення і не змог патлумачыць міліцыянерам свае дзеянні.
Пакуль яшчэ праводзіцца праверка, таму невядома, якое пакаранне пагражае жыхару аграгарадка.
