Жыхар Баранавічаў справакаваў масавую бойку ў бары, ёсць пацярпелыя
У бары, ілюстрацыйнае фота / pixabay.com
Сілавікі затрымалі жыхара Баранавічаў, які справакаваў масавую бойку ў мясцовым бары. Пачалося ўсё з таго, што мужчына "беспадстаўна з хуліганскіх памкненняў нанёс не менш як 12 удараў аднаму з наведвальнікаў бара". Да высвятлення адносін падключыліся і іншыя госці. У выніку ў бойцы прынялі ўдзел сем чалавек. Некаторыя з іх атрымалі цялесныя пашкоджанні. Пацярпеў і бар — яго прыйшлося часова зачыніць.
Віноўніка здарэння ўжо дома затрымліваў Брэсцкі ГУБАЗіК. Сілавікі кажуць, што мужчыну раней ужо неаднаразова судзілі — за крадзеж, разбой і незаконны абарот зброі. Яму 42 гады, і ён сам, па словах сілавікоў, пазіцыянуе сябе як "крымінальны аўтарытэт". На гэты раз на яго завялі крымінальную справу за хуліганства.
