ЗША патрабуюць адказнасці для ўсіх, хто датычны да пасадкі Ryanair у Мінску

18/02/2022 - 05:26

ЗША патрабуюць адказнасці для ўсіх, хто датычны да пасадкі пасажырскага самалёта Ryanair у Мінску ў траўні 2021-га. Пра гэта заявіў прадстаўнік Злучаных Штатаў пры Міжнароднай арганізацыі грамадзянскай авіяцыі (ICAO) Чэслі Саленбергер. Ён нагадаў пра "шматлікія прабелы і разыходжанні ў беларускай версіі падзей", пра якія згадваецца ў справаздачы ICAO. І яны "не пакідаюць сумненняў у тым, што беларускія чыноўнікі сфабрыкавалі ілжывую пагрозу выбуху", каб прымусіць пілотаў самалёта, які ляцеў з Грэцыі ў Літву, прызямліцца ў Беларусі з мэтай арышту "палітычнага апанента" Рамана Пратасевіча і яго спадарожніцы Сафіі Сапега.

Прадстаўнік ЗША піша пра "нахабны ўчынак", "хітрыкі і адкрытую хлусню беларускіх чыноўнікаў", якія "падвергнулі рызыцы пасажыраў і экіпаж, парушылі міжнародныя авіяцыйныя нормы", а таксама "разбурылі найважнейшыя повязі даверу паміж авіядыспетчарамі і пілотамі ў гэтым рэгіёне". Саленбергер лічыць, што "рэжым Лукашэнкі стварыў небяспечны прэцэдэнт", і цяпер экіпажы міжнародных рэйсаў "могуць абгрунтавана сумнявацца ў тым, што яны могуць разлічваць на авіядыспетчараў у плане атрымання дакладнай і надзейнай інфармацыі і дапамогі". Таму "мусіць быць адказнасць".

23 траўня 2021-га года пасажырскі самалёт іраландскай авіякампаніі здзейсніў вымушаную пасадку ў Мінску. Беларускі дыспетчар паведаміў пілоту, што атрымаў ліст аб выбуховым прыстасаванні на борце, якога ў выніку не знайшлі. Затрыманыя тады Пратасевіч і Сапега дагэтуль пад кантролем сілавікоў у Беларусі. ЕС, Украіна прынялі рашэнне аб спыненні палётаў над тэрыторыяй Беларусі, закрылі сваё неба для беларускіх авіякампаній. У дачыненні афіцыйнага Мінска быў уведзены чарговы пакет еўрапейскіх санкцый.

Сёлета быў разгледжаны даклад спецыяльнай камісіі Міжнароднай арганізацыі грамадзянскай авіацыі. Было вырашана, што расследаванне інцыдэнту з самалётам авіякампаніі Ryanair будзе працягнута.

Чэслі Саленбергер — былы пілот, які вядомы тым, што ў 2009-м здолеў пасадзіць самалёт з непрацоўнымі рухавікамі на раку і такім чынам выратаваў пасажыраў. У апошнія гады ён займаецца праблемамі авіяцыйнай бяспекі.

Belarus officials deceived and manipulated airline pilots, putting passengers and crew at risk for Lukashenka regime’s political purposes. There must be accountability.

My statement about ICAO investigation and ICAO Council decision: https://t.co/rH6IvqURld
— Ambassador C.B. Sullenberger (@USAmbICAO) February 17, 2022