Звольнілі дырэктара Нясвіжскага музея, які ўзняў над палацам нацыянальны сцяг
![Звольнілі дырэктара Нясвіжскага музея, які ўзняў над палацам нацыянальны сцяг](/sites/default/files/styles/gallery_main/public/2023-08/niasviz-0912.jpg.webp?itok=12J1RH8F)
Са сваёй пасады звольнены дырэктар Нацыянальнага гісторыка-культурнага музея-запаведніка "Нясвіж" Сяргей Клімаў.
"У Міністэрстве культуры папрасілі напісаць заяву па ўласным жаданні, але я адмовіўся. Таму знайшлі артыкул у Працоўным кодэксе", — распавёў ён у каментары TUT.by.
Клімава звольнілі паводле артыкула 259 Працоўнага кодэкса. Раней па гэтым жа самым артыкуле звальнялі дырэктара Купалаўскага тэатра Паўла Латушку.
Артыкул фармулюецца наступным чынам: "Па рашэнні ўласніка маёмасці арганізацыі або ўпаўнаважанага ім органа працоўная дамова з кіраўніком арганізацыі можа быць скасаваная да заканчэння тэрміну яё дзеяння ў выпадку адсутнасці вінаватых дзеянняў (бяздзейнасці) кіраўніка арганізацыі".
Клімаў кажа, што яму ўжо тэлефанавалі з аддзела кадраў Мінкультуры і прасілі забраць працоўную кніжку. Дарэчы, ён кіраваў музеем 10 гадоў. Экс-дырэктар не выключае, што следам за ім можа звольніцца і частка калектыву.
Сёлета ў жніўні, пасля выбараў, над Нясвіжскім палацам быў узняты нацыянальны бел-чырвона-белы сцяг.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.