Абаронцы Курапатаў перанеслі сустрэчу з гаспадарамі рэстарана "Поедем поедим"

Сустрэча па Курапатах, у якой возьмуць удзел гаспадары рэстарана "Поедем поедим", абаронцы Курапатаў і прадстаўнікі ўладаў, адбудзецца пасля 3 ліпеня. Пра гэта Еўрарадыё распавёў лідар партыі БНФ Рыгор Кастусёў:

"Спачатку сустрэча была запланаваная на 29 чэрвеня. Але ў гэты дзень ў Трасцянцы адбудзецца мітынг-рэквіем з удзелам шматлікіх замежных гасцей. Нас таксама цікавіць гэтае мерапрыемства, таму мы прапаноўвалі Леаніду Зайдэсу іншую дату — 27 чэрвеня. Ён акурат быў у ад'ездзе, таму дамовіліся сустрэцца пасля 3 ліпеня".

Тыдзень таму стала вядома, што ўладальнікі рэстарана ў Курапатах самі выйшлі на лідара БНФ Рыгора Кастусёва і для вырашэння канфлікта прапанавалі "некалькі канструктыўных рашэнняў". Сярод іх — перавод рэстарана з забаўляльнага ў сямейны фармат і ахвяраванне на мемарыял 100 тысяч долараў альбо ператварэнне аднаго з дамкоў забаўляльнага комплексу ў музей ахвяраў сталінскага рэжыму. Яшчэ адзін варыянт — прадажа комплексу цалкам па балансавым кошце.