Адразу 8 чалавек будуць судзіць у Баранавічах паводле "народнага артыкула" КК
Суд у Баранавічах / "Наш край"
7 траўня ў судзе Баранавіцкага раёна і горада Баранавічы адбудзецца суд адразу над васьмю "палітычнымі".
Як піша праваабарончы цэнтр "Вясна", суддзя Вікторыя Пакунова будзе разглядаць справу паводле арт. 342 Крымінальнага кодэксу (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
Абвінавачанымі па справе праходзяць Канстанцін Каляга, Эрык Каласоўскі, Іван Пацко, Аляксандр Лаўрушчык, Іван Дрык, Павел Сергіеня, Дзмітрый Філіповіч, Арцём Лапіч.
Як распавядала Еўрарадыё, на пачатку красавіка ў Баранавічах за ўдзел у пратэстах судзілі адразу 17 чалавек.
