Адвакат затрыманай у Маскве Насці Рыбкі звернецца ў консульства Беларусі

Насця Рыбка (Анастасія Вашукевіч) з Бабруйска атрымала вядомасць пасля з’яўлення ў лютым 2018-га скандальнага карупцыйнага расследавання расійскага апазіцыйнага палітыка Аляксея Навальнага. "Паляўніца на мільярдэраў", якая жыла ў Маскве, несвядома (Навальны выкарыстаў фота і відэа з яе Instagram) дапамагла раскрыць сувязь расійскага алігарха Алега Дзерыпаскі і віцэ-прэм’ера Сяргея Прыходзькі. Дзерыпаска падаваў у суд на Рыбку.

У тым жа лютым 2018 года Насця Рыбка трапіла ў іншую скандальную гісторыю. У Тайландзе яе затрымалі ў складзе групы з дзясятка чалавек за арганізацыю сэкс-трэнінгу. Ад таго часу беларуска была ў зняволенні, рабіла розныя скандальныя заявы. Нядаўна Насця Рыбка і яе сябар Алекс Леслі (Аляксандр Кірылаў) былі асуджаныя на ўмоўны тэрмін зняволення за прадастаўленне паслуг сэксуальнага характару. Яны прызналі сваю віну і былі дэпартаваныя ў Расію. Аднак адразу ж па прылёце ў Маскву Насцю Рыбку, яе сябра і яшчэ двух чалавек (мужчыну і жанчыну) затрымалі расійскія праваахоўнікі. Яны знаходзяцца ў ізалятары часовага ўтрымання Зяблікава. У суд іх прывязуць у суботу. Насцю Рыбку і іншых падазраюць "ва ўцягванні ў занятак прастытуцыяй у складзе групы асобаў". Ім пагражае да 6 гадоў пазбаўлення волі.