Беларусь павінна застацца прэзідэнцкай рэспублікай — Лукашэнка
У Канстытуцыю РБ плануецца ўнесці змены / БЕЛТА
Беларусь павінна застацца прэзідэнцкай рэспублікай. Пра гэта заявіў Аляксандр Лукашэнка на пасяджэнні рабочай групы па дапрацоўцы праекта новай Канстытуцыі ў чацвер, паведамляе прэс-служба Лукашэнкі.
"Я абсалютна перакананы, што Беларусь павінна быць прэзідэнцкай рэспублікай, калі мы хочам захаваць краіну. І Усебеларускі народны сход ўводзіцца не таму, што нехта з прысутных або дзеючы прэзідэнт прама рвецца на гэтую пасаду, а для таго, каб забяспечыць стрымліванне і процівагу", — сказаў Аляксандр Лукашэнка.
Паводле слоў Лукашэнкі, рабочая група павінна працягнуць распачатую Канстытуцыйнай камісіяй працу. Галоўная задача яе ўдзельнікаў — "не дапусціць разбалансаванасці сістэмы органаў дзяржаўнай улады".
Як паведамляла Еўрарадыё, рэферэндум па Канстытуцыі можа адбыцца ў канцы лютага 2022 года. Змены будуць тычыцца перш за ўсё паўнамоцтваў прэзідэнта, парламента, урада, мясцовых органаў улады. У новай Канстытуцыі таксама могуць быць замацаваны статус і паўнамоцтвы Усебеларускага народнага сходу.
