Беларускае прадпрыемства паскардзілася, што ў Бранску могуць падрабляць масла
Беларускае прадпрыемства "Малочны свет" паскардзілася ў Маскву ў Рассельгаснагляд, што ў Бранску могуць выпускаць фальсіфікаванае сметанковае масла пад яго брэндам. Беларусы паведамляюць, што факт рэалізацыі падобнага тавару па цэнах ніжэйшых за рынкавыя быў выяўлены ў адным з гандлёвых павільёнаў у расійскай сталіцы. На этыкетцы сметанковага масла "Беларускае" вытворцам быў пазначаны "Малочны свет", але дадаткова была змешчана інфармацыя пра бранскую кампанію "Белгандаль".
"Малочны свет" папрасіў Рассельгаснагляд правесці сумесную праверку. Беларускае прадпрыемства сцвярджае, што ніякіх фінансава-гаспадарчых адносін з бранскімі вытворцамі не мае. Дарэчы, узор фальсіфікаванай прадукцыі беларусы адправілі ў лабараторыю ў Гродна і высветлілася, што яна не адпавядае патрабаванням. Дарэчы, скаргі ад спажыўцоў на сумнеўную якасць прадукцыі ў "Малочны свет" прыходзяць рэгулярна. На прадпрыемстве лічаць, што гэта толькі пацвярджае факты вырабу кантрафактнай прадукцыі, якія наносяць страты яго дзелавой рэпутацыі.
