Чаму эвакуацыйныя выхады ў мінскіх гандлёвых цэнтрах зачыненыя?
![Чаму эвакуацыйныя выхады ў мінскіх гандлёвых цэнтрах зачыненыя?](/sites/default/files/styles/gallery_main/public/2023-08/20160715_021822.jpg.webp?itok=VE3lk0I7)
Аляксандр Лукашэнка даручыў МНС правесці праверку ўсіх гандлёвых цэнтраў у Беларусі да канца сакавіка, то бок, за пяць дзён. Афіцыйны прадстаўнік Міністэрства па надзвычайных сітуацыях Віталь Навіцкі распавёў Еўрарадыё, што супрацоўнікі правераць каля 300 аб’ектаў.
Прычынай стала трагедыя ў гандлёвым цэнтры “Зімовая Вішня” у расійскім горадзе Кемерава, дзе ў выніку пажару загінула больш за 60 чалавек, і яшчэ прыкладна дзесяць лічацца зніклымі без вестак. Па папярэдніх дадзеных, эвакуацыйныя выхады былі зачыненыя і шмат хто з-за гэтага не змог выбрацца з будынка.
Еўрарадыё вырашыла прайсціся па папулярных гандлёвых цэнтрах у Мінску і паглядзець, як там сітуацыя з запаснымі выхадамі.
“Сталіца”
У “Сталіцы” на кожным паверсе па два эвакуацыйныя выхады, размешчаныя ў сярэдзіне гандлёвых шэрагаў. Аднак праз іх не выйсці — яны зачыненыя на электрамагнітныя замкі. Побач з дзвярыма чырвоным гарыць электронны замок, указваючы, што дзверы зачыненыя.
![Чаму эвакуацыйныя выхады ў мінскіх гандлёвых цэнтрах зачыненыя?](/sites/default/files/paragraphs/image/b0de5656-0de4-4d63-a4c6-4a1ee98cfdd4.jpeg)
“Галілеа”
У “Галілеа” на кожным паверсе не менш за тры эвакуацыйныя выхады. Яны таксама зачыненыя на электрамагнітныя замкі. Праходу няма.
Dana Mall
З аднаго боку будынку ўсе дзверы зачыненыя на электронныя замкі і пазначаныя як “Службовыя”. З іншага боку ў напаўцёмных калідорчыках драўляныя дзверы без пазначэння. Частка з іх зачынена на электрамагнітныя замкі. Атрымалася знайсці адчыненыя дзверы. За імі — цемра лесвічных пралётаў. Прайшоўся па гэтай лесвіцы — дзверы на іншыя паверхі былі замкнёныя. Выйсці можна толькі на вуліцу.
![Чаму эвакуацыйныя выхады ў мінскіх гандлёвых цэнтрах зачыненыя?](/sites/default/files/paragraphs/image/c7d6ef9d-e301-45a7-967c-61cbb5f9f5ad.jpeg)
"На кожны выпадак трэба глядзець праект, — тлумачыць Віталь Навіцкі. — Калі гэта адпавядае праекту, дык праблемы няма. Ёсць розныя тэхналагічныя рашэнні. Галоўная ўмова, якая павінна быць выкананая, каб падчас эвакуацыі ўсе патрэбныя выхады былі адкрытыя. А якім чынам гэта дасягаецца — выбірае ўласнік".
Што аб гэтым гаворыцца ў заканадаўчых актах?
У дэкрэце №7 ад 23 лістапада 2017 года ў дадатку №3, частка “Патрабаванні па забеспячэнні эвакуацыі пры пажары”:
Пункт 48. Замкі на дзвярах, размешчаных на шляхах эвакуацыі, павінны забяспечваць магчымасць іх вольнага адчынення знутры без ключа.
Пункт 49. У выпадках неабходнасці замкоў на дзвярах дапускаюцца электрамагнітныя замыкальнікі, якія спрацоўваюць уручную, дыстанцыйна і аўтаматычна — ад абсталявання пажарнай аўтаматыкі.
Верагодна, акурат такія замкі, пра якія вядзецца гаворка ў пункце 49 дэкрэта, мы і пабачылі ў мінскіх гандлёвых цэнтрах. Але атрымаць аператыўныя тлумачэнні ад супрацоўнікаў ГЦ Еўрарадыё не змагло — усе ўстрымліваюцца ад каментароў.