Цыклон "Фаб'ен" абясточваў амаль 500 населеных пунктаў па ўсёй Беларусі
Пацярпелых ад цыклону "Фаб'ен", які прыйшоў у Беларусь 24 верасня, няма. Пра гэта паведамляе прэс-служба Міністэрства па надзвычайных сітуацыях.
Парывы ветру, якія дасягалі 21 метра за секунду, валілі дрэвы і адключалі электрычнасць.
Паводле інфармацыі МНС, за мінулыя суткі вецер пашкодзіў дах аднаго жылога дома і аднаго сельскагаспадарчага будынка. 44 разы супрацоўнікі МНС ды іншых арганізацый выязджалі прыбіраць паваленыя дрэвы. На Брэстчыне было зафіксавана 23 такія выпадкі, на Гомельшчыне — 7, на Міншчыне — 1, на Магілёўшчыне —13. Паваленыя дрэвы пашкодзілі шэсць легкавых аўтамабіляў.
У Лельчыцах на Гомельшчыне каля 14-й гадзіны адключылася электраэнергія, бо на высакавольтную лінію 110 кВ звалілася дрэва. Прыкладна праз гадзіну падача электрычнасці ў райцэнтры была адноўленая.
Па звестках ДВА "Белэнерга", на працягу сутак на тэрыторыі краіны парушалася электразабеспячэнне 488 населеных пунктаў. Усе адключэнні былі аператыўна ліквідаваныя.
