Гамельчука затрымалі і вінавацяць у перадачы інфармацыі ў "Беларускі Гаюн"

Гомельскія сілавікі затрымалі хлопца, які нібыта дасылаў інфармацыю пра вайскоўцаў у "Беларускі Гаюн".

"Беларускі Гаюн" — група, якая маніторыць сітуацыю ў Беларусі ў сувязі з вайной, якую Расія развязала супраць Украіны. Беларуская тэрыторыя выкарыстоўвалася для агрэсіі супраць Украіны, і да сёння на тэрыторыі Беларусі знаходзяць прытулак расійскія вайскоўцы.

У тг-канале сілавікоў з'явілася відэа з затрыманым гамельчуком, заўважылі праваабаронцы "Вясны". Пад прымусам ён кажа, быццам "дасылаў у чат-бот ініцыятывы інфармацыю пра перамяшчэнне расійскай ваеннай тэхнікі па тэрыторыі Беларусі".

Сілавікі заяўляюць, што хлопцу пагражае крымінальная справа за "садзейнічанне экстрэмісцкай дзейнасці" (арт. 361-4 КК).