Казахстан збіраецца больш актыўна прасоўваць свае тавары ў Беларусь

Казахстан збіраецца больш актыўна прасоўваць свае тавары ў Беларусь. Ужо абноўлены пералік патэнцыйных экспартных пазіцый. Найбліжэйшым часам яго перададуць на разгляд кіраўніцтву Беларусі. Пра гэта заявіў прэм'ер-міністр Казахстана Аліхан Смаілаў на сустрэчы з беларускім калегам Раманам Галоўчанкам, піша выданне "Власть". 

"На дадзеным этапе мы гатовыя сумесна прапрацаваць пастаўкі 105 відаў несыравінных тавараў у розных галінах", — сказаў Смаілаў. Паводле яго словаў, адным з прыярытэтных напрамкаў супрацоўніцтва будзе прамысловая кааперацыя. Ужо запушчана сем праектаў, створана паўтары тысячы рабочых месцаў. Яшчэ два праекты знаходзяцца на стадыі рэалізацыі.

Галоўчанка са свайго боку казаў пра супрацоўніцтва ў сферы сельскай гаспадаркі, прапаноўваў дапамагчы са стварэннем таварна-малочных комплексаў па беларускіх тэхналогіях у Казахстане.

"Власть" нагадвае, што летам у Мінска і Астаны ўзнікалі рознагалоссі з нагоды гандлю алкаголем. У Казахстане казалі, што Беларусь не дае экспартаваць спіртное, пагражалі мерамі ў адказ. У выніку за першае паўгоддзе экспарт казахстанскага алкаголю ў Беларусь аказаўся роўны нулю.