КДБ: падпал будынка ДАІ ў Мазыры — акт тэрарызму

Пра здарэнне, якое адбылося ўначы 28 кастрычніка, раней паведаміла прэс-служба Следчага камітэта. Невядомы разбіў шкло ў акне і кінуў у памяшканне бутэльку з гаручай вадкасцю. У выніку адзін з службовых пакояў моцна пацярпеў ад агню. Ніхто з людзей не пацярпеў. Крымінальную справу спачатку распачалі па артыкуле "Асабліва злоснае хуліганства" (ч. 3 арт. 339 КК). Але адбылася перакваліфікацыя ў "акт тэрарызму" (ч. 1 арт. 289 КК).

КДБ і іншыя праваахоўныя органы шукаюць зламысніка ці зламыснікаў. Высвятляецца, што на сцяне будынка пад разбітым акном быў зроблены надпіс "Адплата!".