Кітай хоча сарваць выбары ў ЗША, а Расія — Алімпіяду ў Парыжы. #ІхНоравы

05/04/2024 - 14:36

Міжнародныя навіны / @rubanau_collage

Усход працягвае плесці падступныя сеткі для Захаду. Кітай хоча паўплываць на вынікі выбараў у ЗША, а Расія — сарваць Алімпіяду ў Парыжы.

На гэтым фоне навіна, што мужчыны будуць часцей хварэць на рак прастаты, нават неяк губляецца. Але мы ўсё роўна ўключылі яе ў штодзённую падборку замежных навін.

Расія зрывае Алімпійскія гульні, на якія яе не пускаюць

На пытанне журналістаў, ці хоча Расія перашкодзіць правядзенню Алімпіяды ў Парыжы, прэзідэнт Францыі Эманюэль Макрон адказаў: "Несумненна, у тым ліку ў інфармацыйным полі".

МАК дапусціў расійскіх спартоўцаў на летнія Алімпійскія гульні 2024 года ў нейтральным статусе — без сцяга і гімна. Да іх выстаўляюцца і дадатковыя патрабаванні: ні самі спартоўцы, ні чальцы іх трэнерскага штаба не павінныя выступаць з актыўнай падтрымкай расійскага ўварвання ва Украіну.

Расіянам гэта, вядома, не падабаецца. Французскія ўлады кажуць, што з нядаўняга часу Расія ўзмацніла прапагандысцкі націск, выкарыстоўваючы фэйкавыя акаўнты ў сацсетках для распаўсюду чутак і дэзінфармацыі.

Францыя таксама лічыць, што менавіта расійскія спецслужбы стаялі за акцыяй у Парыжы, калі пасля нападу ХАМАС на Ізраіль 7 кастрычніка на сценах дамоў у французскай сталіцы з'явіліся зоркі Давіда. У гэтым убачылі спробу прынесці раскол у французскае грамадства.

Кітай прасоўвае сваіх на выбарах у ЗША, Паўднёвай Карэі і Індыі

У 2024 годзе Кітай паспрабуе паўплываць на выбары ў ЗША, Паўднёвай Карэі і Індыі з дапамогай кантэнту, створанага штучным інтэлектам. Пра гэта папярэдзіла Microsoft.

У кібератаках, якія падтрымлівае кітайска дзяржава, будзе ўдзельнічаць і Паўночная Карэя.

Microsoft заявіла, што Кітай будзе ствараць і распаўсюджваць праз сацыяльныя сеткі кантэнт, які "прынясе ім карысць на блізкіх выбарах у гэтых краінах". У кампаніі дадалі, што ўплыў кантэнту, створанага штучным інтэлектам, будзе нязначны, але папярэдзілі, што сітуацыя можа развівацца непрадказальна.

У справаздачы Microsoft гаворыцца, што Кітай ужо спрабаваў правесці кампанію па дэзінфармацыі з дапамогай штучнага інтэлекту на прэзідэнцкіх выбарах у Тайвані.

Рак прастаты атакуе

Рак прастаты ўжо сёння з'яўляецца асноўнай прычынай смяротнасці і інваліднасці, а таксама самай распаўсюджанай формай раку ў мужчын больш чым у 100 краінах. Улічваючы старэнне насельніцтва і рост працягласці жыцця ва ўсім свеце, прагназуецца рэзкі рост захворвання і смяротнасці цягам наступных 15 гадоў, піша The Guardian.

Паводле прагнозаў спецыялістаў, колькасць дыягназаў павялічыцца з 1,4 мільёна выпадкаў на год цяпер да 2,9 мільёна да 2040 года. Гэта значыць, што сёння рак прастаты кожную гадзіну выяўляюць у 159 мужчын, а праз 15 гадоў яго будуць знаходзіць ужо ў 330 мужчын. Кожную гадзіну!

Да 2040 года колькасць смерцяў ад раку прастаты ў свеце вырасце на 85%: з 375 000 да амаль 700 000. Сапраўдная колькасць смерцяў, відаць, будзе вышэйшая праз недастатковую дыягностыку і адсутнасць двестак у краінах з сярэднім узроўнем даходу.

"Мы ведаем, што набліжаецца ўсплёск захворвання, таму трэба пачаць планаваць і прымаць меры ўжо цяпер", — кажа галоўны аўтар даследавання.

Сімптомы раку прастаты могуць уключаць патрэбу ў часцейшым мочаспусканні, цяжкасці з пачаткам мочаспускання, адчуванне, што мачавы пухір не апаражняецца цалкам, а таксама наяўнасць крыві ў мачы ці сперме.

У Замбіі слон напаў на джып з турыстамі

Слон атакаваў джып падчас экскурсіі ў дзікай прыродзе, вядомай як сафары-драйв, у нацыянальным парку Кафуэ ў Замбіі. У выніку загінула 80-гадовая грамадзянка ЗША. Пра гэта паведамляе CNN.

Слон некалькі разоў перакуліў машыну, у якой было шэсць чалавек. Амерыканская турыстка ад атрыманых траўмаў памерла, яшчэ чатырох турыстаў даставілі ў бальніцы Замбіі і ПАР.
Замбія папулярная сярод падарожнікаў-сафары дзякуючы мноству нацыянальных паркаў і якасці гідаў.

Кафуэ — найбуйнейшы нацыянальны парк краіны. Тут можна ўбачыць львоў, леапардаў і многіх іншых экзатычных жывёл. Вось і сланоў таксама.