Ландсбергіс назваў агульную лінію абароны краін Балтыі падрыхтоўкай да вайны

Міністр замежных спраў Літвы Габрыелюс Ландсбергіс назваў праект агульнай лініі абароны краін Балтыі падрыхтоўкай да магчымай вайны. "Гэта таксама палітычнае пасланне — пасланне Літвы, Латвіі і Эстоніі, — цытуе яго словы Delfi. — Што мы адчуваем набліжэнне вайны. Мы разумеем, што, калі Расія не будзе спыненая ва Украіне, яна пойдзе далей. А далей будуць краіны Балтыі... Гэта не недавер, гэта — падрыхтоўка да таго, што можа адбыцца".

Ландсбергіс спадзяецца, што падрыхтоўка лініі абароны стане дастатковым сігналам "сябрам і партнёрам у Еўропе", што да сітуацыі варта ставіцца сур'ёзна. Якраз NATO пачынае самыя буйныя вучэнні з часоў халоднай вайны.

Пра тое, што краіны Балтыі пабудуюць лінію абароны ўздоўж мяжы з Расіяй і Беларуссю, міністры абароны Латвіі, Літвы і Эстоніі дамовіліся днямі на сустрэчы ў Рызе. Праект мусіць быць рэалізаваны ў бліжэйшыя гады. Габрыелюс Ландсбергіс перакананы, што час для падрыхтоўкі да супраціўлення магчымай агрэсіі вельмі абмежаваны. "Украіна адваёўвае для нас час сваёй крывёю, сваімі жыццямі, усім, што ў яе ёсць. І мы не ведаем, колькі яшчэ часу яны змогуць нам выйграць", — гаворыць міністр замежных спраў Літвы.