Лукашэнка расказаў дэталі сакрэтнага даклада па праваахоўных органах

Сакрэтны даклад па працы праваахоўных органаў агучыў Аляксандр Лукашэнка на нарадзе 20 жніўня, перадае БЕЛТА. 

Па яго словах, напярэдадні нарады ён даручыў адпаведным органам улады і структурам падрыхтаваць даследаванне на гэтую тэму. І хаця дакумент сакрэтны, кіраўнік Беларусі вырашыў агучыць яго — "у той ступені, у якой гэта можна зрабіць, не закранаючы асобную канкрэтыку".

Па-першае, ён заявіў пра нізкую якасць даследчых праверак і папярэдняга следства. Міліцыянты павярхоўна даследуюць заявы і паведамленні пра злачынствы, парушаюць парадак і ўмовы правядзення аператыўна-вышуковых мерапрыемстваў, у тым ліку выносяць нематываваныя пастановы, вельмі павольна высвятляюць, хто ўчыніў злачынства. 

Лукашэнка раскрытыкаваў дзейнасць Дэпартамента фінансавай разведкі Камітэта дзяржкантролю. Яны, маўляў, стараюцца выявіць як мага большыя сумы нявыплачаных падаткаў і плацяжоў, а не імкнуцца не дапусціць правапарушэнняў у эканамічнай сферы, прадухіліць атрыманне незаконных даходаў. 

Па-другое, Лукашэнка раскрытыкаваў злоўжыванні службовымі паўнамоцтвамі з боку праваахоўнікаў. Па яго словах, яны займаюцца ціскам на ўдзельнікаў крымінальнага працэсу — падазраваных, абвінавачаных, адвакатаў і нават суддзяў. Заявіў ён і пра факты фальсіфікацыяў у працэсуальных дакументах і высновах экспертыз. 

"Пасля сённяшняй гістарычнай нарады па ўсіх гэтых пытаннях ціск будзе ўзмоцнены. І, як я сказаў аграрыям, у сяго-таго вочы на ​​лоб палезуць, калі вы не зменіце падыходы ў гэтай частцы", — дадаў Лукашэнка. 

Гаворачы аб празмерным ужыванні сілы, кіраўнік паведаміў, што ў дзяржаве ёсць непадкантрольныя спецпадраздзяленні. "Прытым выкарыстоўваюць, асабліва гэта для міліцыі характэрна, спецпадраздзяленні. У прыватнасці, спецпадраздзяленне "Алмаз". Ганьбяць хлопцаў толькі. Трэба звярнуць увагу на гэтыя спецслужбы. У нас іх чатыры-пяць падраздзяленняў. Іх трэба ўзяць пад кантроль", — заявіў ён.

Раскрытыкаваў Лукашэнка і неабгрунтаваныя крымінальныя справы (найперш карупцыйныя), якія ў судзе развальваюцца за адсутнасцю складу ці нязначнасцю наступстваў. "Часта ўзбуджэнне крымінальных спраў у дачыненні да службовых асоб набывае шырокую агалоску ў СМІ, а іх наступнае спыненне па рэабілітуючых падставах выклікае негатыўную рэакцыю насельніцтва і з'яўляецца падставай для крытыкі праваахоўных органаў і ўлады ў цэлым", — перасцярог беларускі кіраўнік.

У чацвёртых, Лукашэнка абурыўся складанасцю судовых працэсаў. "У нас склалася такая практыка: суддзі, каб прыняць нейкае рашэнне, трэба куча доказаў і аб'ёмаў нейкіх фактаў злачынстваў. Практыка нягодная! Дастаткова аднаго-паўтара злачынстваў, каб нягодніка пакараць", — запатрабаваў ён.

Раскрытыкаваў кіраўнік дзяржавы і фармальна-статыстычны падыход да ацэнкі праваахоўнай дзейнасці. "Калёным жалезам варта гэта выпаліць. Словамі не дапаможам. Трэба гэта зрабіць на падставе заканадаўчых актаў, бо яны па-ранейшаму будуць ставіць палачкі-галачкі і выхваляцца, якія яны вялікія, колькі расследавалі крымінальных спраў", — заявіў Лукашэнка.

Ён запатрабаваў, каб справы за хабар пачыналі толькі пры наяўнасці неаспрэчных доказаў. А то часам абвінавачанні грунтуюцца на чыіх-небудзь блытаных успамінах пра падзеі даўніх гадоў. У такіх умовах узрастае рызыка абгавору. 

"Хабар — гэта калі вы зафіксавалі аўдыя, відэа, што чалавеку прынеслі і далі яго. Усё — нікуды не дзенешся, не выкруцішся. А што такое, калі чалавек недзе ўспомніў, што ён камусьці даў хабар? І пачынаецца (гэта асабліва для міліцыі характэрна): хтосьці дзесьці сказаў — чалавеку заламалі рукі і пачалі выкручваць. Павінны быць жалезабетонныя доказы падобных рэчаў, бо мы прыйдзем да таго, што ў грамадстве з'явіцца і буяна будзе квітнець практыка: ня спадабаўся чалавек — агаварыў яго, даў супраць яго паказанні, і пайшлі", — цытуе БЕЛТА словы Лукашэнкі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.