Макей у ААН паскардзіўся на страты Беларусі ад антырасійскіх санкцый

Беларусь адчувае страты ад санкцыяў, якія Захад увёў супраць Расіі. Гэта вынікае з прамовы міністра замежных спраў Уладзіміра Макея на 73-й сесіі Генеральнай Асамблеі ААН. З гэтай прамовай ён выступіў з трыбуны ААН 1 кастрычніка, паведамляе прэс-служба МЗС.

Па словах Макея, глабалізацыйныя працэсы ў свеце суправаджаюцца з'яўленнем новых геапалітычных і геаэканамічных ліній і разломаў. Такім чынам, інтэграцыя ідзе адначасова з фрагментацыяй, пратэкцыянізмам і нават канфрантацыяй.

Беларускі міністр нагадаў, што Беларусь уваходзіць у Еўразійскі эканамічны саюз, але пры гэтым яна зацікаўленая ў эканамічным узаемадзеянні з Еўрасаюзам. 

"Апынуўшыся на стыку двух геапалітычных цэнтраў сілы, мы ў поўнай меры адчуваем на сабе ўзаемасувязь геапалітыкі і геаэканомікі. З-за канфлікту ва Украіне і росту напружанасці ў рэгіёне, санкцый і контрсанкций наша краіна хай не наўпрост, а ўскосна, але нясе значныя эканамічныя страты", — паведаміў кіраўнік беларускай дыпламатыі.

"Беларусь мае адкрытую эканоміку: 60-70% нашага ВУП экспартуецца. Таму наша краіна вельмі моцна залежыць ад знешніх рынкаў і міжнароднага гандлю", — падкрэсліў Макей.

Ён прапанаваў "справядлівую, прадказальную і недыскрымінацыйную гандлёва-эканамічную архітэктуру — як у Еўропе, так і ў іншых рэгіёнах свету, — якая ўлічвала б інтарэсы ўсіх дзяржаў".

Наша краіна, па яго словах, асабліва зацікаўленая ў збліжэнні Еўразійскага эканамічнага саюза і Еўрасаюза.