Міхаіл Пузікаў прызначаны намеснікам дзяржсакратара Савета бяспекі Беларусі
![Міхаіл Пузікаў прызначаны намеснікам дзяржсакратара Савета бяспекі Беларусі](/sites/default/files/styles/gallery_main/public/2023-08/c75dc8f7a3e48da215aaa52d25f066c6.jpg.webp?itok=famBSr7k)
Генерал-маёр Міхаіл Пузікаў прызначаны намеснікам дзяржсакратара Савета бяспекі Беларусі. Адпаведны ўказ Аляксандр Лукашэнка падпісаў 23 лістапада. Гэтым жа дакументаў Пузікаў вызвалены ад ранейшай пасады — намесніка міністра абароны.
Вядома, што Пузікаў — ураджэнец Брасаўскага раёна Бранскай вобласці Расіі. Яму днямі споўнілася 54 гады. У 1998 годзе Міхаіл Пузікаў скончыў Ваенную акадэмію Рэспублікі Беларусь, служыў на розных пасадах у ракетных войсках. У 2004-м ён скончыў Ваенную акадэмію Генштабу Узброеных сілаў Расіі. Праз некаторы час стаў начальнікам ракетных войскаў і артылерыі Узброеных сілаў Беларусі. У снежні 2009 года Лукашэнка прызначыў Пузікава намеснікам міністра абароны па кадрах і падрыхтоўцы войскаў, а ў лютым 2012-га — намеснікам міністра абароны.
Як паведамляла Еўрарадыё, 4 лістапада на пасаду дзяржсакратара Савета бяспекі Беларусі быў прызначаны генерал-маёр Станіслаў Зась, ураджэнец Чарнігаўскай вобласці Украіны.
Фота: mil.by