Мінскія ўлады адказалі, што рабіць пры высокіх цэнах на таксі
Таксоўка, ілюстрацыйнае фота / av.by
Тыя, каму стала дорага ездзіць на таксі, могуць карыстацца наземным транспартам. Так першая намесніца старшыні Мінгарвыканкама Надзея Лазарэвіч адказала ў эфіры дзяржтэлеканала СТБ на крытыку высокіх цэн.
"Калі вы не згодныя з цэнаўтварэннем таксі, для вас дорага, у нас ёсць наземны транспарт, падземны транспарт, цалкам лагістычныя шляхі выбудаваныя ў Мінску, маршруткі. Таму права выбару для чалавека ёсць. Не ўсё сышлося на таксі", — заявіла чыноўніца.
Таксама яна зазначыла, што ў Мінску з'яўляюцца новыя прыпынкі, адкрываюцца станцыі метрапалітэна і гэтак далей. Наземным грамадскім транспартам, паводле Лазарэвіч, можна даехаць больш зручна, чым на таксоўцы і "больш хутка ў нейкіх ступенях".
Улады з 1 лістапада памянялі правілы дзейнасці таксовак і маршрутак. Яны ўсе павінны зарэгістравацца ў Адзіным рэестры і выконваць шэраг патрабаванняў. Пасля гэтага колькасць таксовак у краіне скарацілася на 25%. Для карыстальнікаў павялічыўся час чакання і выраслі расцэнкі. Апошнім часам колькасць зарэгістраваных таксовак паволі пачала павялічвацца.
