МУС: Беларускія праваахоўнікі ў падзеях Майдана не ўдзельнічаюць
Міліцыя абвергла звесткі пра тое, што беларускія міліцыянты дапамагаюць разганяць акцыі пратэсту ва Украіне.
Адпаведны запыт дасылалі ўдзельнікі студзеньскага Марафона Салідарнасці ў падтрымку Майдана:
“У электронных СМІ ды сацыяльных сетках апошнім часам абмяркоўваецца магчымы удзел супрацоўнікаў беларускіх спецслужбаў у выкраданні, збіцці і забойствах актывістаў Еўрамайдана ва Украіне. На падставе арт.18 Канстытуцыі Рэспублікі Беларусь... мы патрабуем не дапусціць удзелу супрацоўнікаў беларускіх спецслужбаў і праваахоўных органаў у гвалтоўных дзеяннях супраць брацкага ўкраінскага народа”.
У пісьмовым адказе намеснік начальніка галоўнага ўпраўлення аховы правапарадку і прафілактыкі МУС Іван Кубракоў (на здымку) паведаміў, што прадстаўленая інфармацыя рэчаіснасці не адпавядае.
