Паблізу літоўскай мяжы ў пятніцу не працавала мабільная сувязь. Што здарылася?

У памежных з Літвой раёнах Беларусі з пятніцы на суботу (22-23 сакавіка) не працавала мабільная сувязь. Гэтую інфармацыю пацвердзілі некалькі крыніц Еўрарадыё.

"Тэхнічных работ у тым рэгіёне не праводзілася"

— Амаль што суткі ні інтэрнэт, ні мабільная сувязь ад МТС не працавала, немагчыма было зрабіць элементарныя дзеянні, — расказалі жыхары памежных раёнаў, занепакоеныя напружаным становішчам на мяжы.

Карэспандэнт Еўрарадыё пад выглядам мясцовага жыхара звярнуўся з праблемай да мабільных аператараў, якія працуюць у Беларусі.

У кампаніях Life:) і А1 расказалі, што тэхнічных работ у тым рэгіёне не праводзілася, таму сувязь павінна была працаваць без перабояў.

А ў кол-цэнтры МТС для праверкі звестак папрасілі назваць дзейны беларускі нумар тэлефона. Без гэтай інфармацыі там адмовіліся ад далейшых зносін.

У размове з адным з былых супрацоўнікаў МТС, які адпрацаваў там больш за пяць гадоў, мы даведаліся, што мабільны аператар у рэальным часе ведае стан/загрузку ўсіх сваіх базавых станцый і называць нумар тэлефона для гэтага зусім неабавязкова.

"Элемент інфармацыйна-псіхалагічнага ціску"

Спецыяліст па нацыянальнай бяспецы Аляксандр Казак расказаў, што збоі ў мабільнай сувязі могуць быць элементам інфармацыйна-псіхалагічнага ціску на жыхароў гэтага рэгіёна.