Падрабязнасці штурму мяжы з боку Польшчы: у дваіх дзяцей — грамадзянства Швецыі

Аўтамабіль BMW на польскай мяжы / RMF FM
Аўтамабіль BMW на польскай мяжы / RMF FM

Двое дзяцей з BMW, які сёння штурмаваў польскую мяжу, мелі шведскае грамадзянства, перадаюць польскія СМІ.

Як распавядала Еўрарадыё, інцыдэнт здарыўся сёння на беларуска-польскай мяжы. На памежным пераходзе Тэрэспаль-Брэст грамадзянін Расіі, які ехаў з боку Польшчы, пратараніў шлагбаўм. Мужчыну затрымалі.

Як паведамляе RMF FM, аўтамабіль BMW, на якім расіянін прыбыў на кантроль каля 7-й гадзіны раніцы, быў зарэгістраваны ў Швецыі. Разам з мужчынам у салоне была жанчына і трое дзяцей. У дарослых і аднаго з дзяцей было расійскае грамадзянства, а ў дваіх астатніх — шведскае.

Памежнік узяў у іх пашпарты для кантролю. У гэты час мужчына націснуў на газ і паехаў у кірунку памежнага моста. "Аўтамабіль знёс шлагбаўм і пераехаў праз раскладзеныя шыпы. Спыніўся на мосце, бо колы здьмуліся", — цытуе TVN24 словы прадстаўніка Надбужанскага аддзела памежнай аховы капітана Дарыюша Сенніцкага.

Жанчына і трое дзяцей перайшлі мост і апынуліся на тэрыторыі Беларусі. Мужчыну затрымалі. Яму пагражае адказнасць за спробу сілавога перасячэння мяжы і знішчэнне маёмасці.

Як удакладняе Сенніцкі, на таран мужчына пайшоў, верагодна, таму, што двое дзяцей са шведскімі пашпартамі не маюць права пакідаць Швецыю.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі