Паліцыя Лондана адпусціла падазраванага ў нападзе на беларускага консула
Паліцыя Лондана вызваліла падазраванага ў інцыдэнце ля амбасады Беларусі, паведамляе ТАСС са спасылкай на Скотланд-Ярд. Мужчына застаецца пад следствам, расследванне справы працягваецца.
Напад на амбасаду Беларусі ў Лондане адбыўся 19 снежня. Пра гэта спярша паведаміў прапагандыстскі ТГ-канал, потым інфармацыю афіцыйна пацвердзіў беларускі МЗС. Праз напад на траіх беларускіх дыпламатаў у Лондане крымінальную справу распачаў Следчы камітэт:
"Нападнікі паводзілі сябе агрэсіўна і нахабна, выказвалі пагрозы, а таксама ўжылі гвалт у дачыненні да дыпламата, якому зламалі нос і прычынілі іншыя траўмы. Па атрыманай следствам інфармацыі, матывам гэтых дзеянняў стала помста за выкананне дыпламатамі сваіх службовых абавязкаў”.
Прапагандысцкія тг-каналы запэўнівалі, што да нападу на амбасаду мае дачыненне арганiзацыя беларусаў у Вялікабрытаніі "Надзея". Гэта суполка, якая каардынуе акцыі дыяспары за мяжой. Аднак старшыня згуртавання беларусаў у Велікабрытаніі Мікалай Пачкаеў заявіў, што беларуская дыяспара ніякага дачынення да сітуацыі з беларускім консулам не мела. 19 снежня ля амбасады сапраўды праходзіла акцыя, але яна завяршылася без здарэнняў.
У сувязі з інцыдэнтам паліцыя затрымала аднаго чалавека.
