Эканамісты з Беларусі, якіх ведае ўвесь свет, — хто яны і дзе працуюць

Не сакрэт, Беларусь дала шмат таленавітых людзей не толькі ў творчай сферы, але і такой дакладнай, як эканоміка. Адзін з беларусаў — Сайман Кузнец — у свой час атрымаў Нобелеўскую прэмію па эканоміцы. 14 кастрычніка былі названыя новыя лаўрэаты — пакуль (!) не беларусы.

Еўрарадыё вырашыла зрабіць топ выхадцаў з Беларусі, якія цяпер працягваюць свае даследчыцкія кар’еры ў найлепшых універсітэтах свету.

Міхаіл Голасаў (Mikhail Golosov)

Нарадзіўся ў Віцебску, а цяпер — прафесар эканомікі Чыкагскага ўніверсітэта. Раней займаў пасады ў Прынстанскім універсітэце, Ельскім універсітэце і Масачусэтскім тэхналагічным інстытуце. У Беларусі скончыў БДЭУ па спецыяльнасці “банкаўская справа”. 

Таксама доктар Голасаў з'яўляецца сурэдактарам выдання American Economic Review, сябрам Эканаметрычнага таварыства і глабальнай незалежнай сеткі даследнікаў CESifo.

Яго галоўны фокус у даследаваннях: макраэканоміка і дзяржаўныя фінансы.

Уваходзіць у спіс 5% лепшых аўтараў па колькасці цытаванняў (на верасень 2024)

Алег Цывінскі (Aleh Tsyvinski)

У той жа рэйтынг па цытаванні ўваходзіць іншы беларус, прычым таксама з Віцебска. Цывінскі — прафесар эканомікі і глабальных адносін у Ельскім універсітэце. Ён таксама скончыў “банкаўскую справу” ў БДЭУ, а працягнуў навучанне ўжо ва ўніверсітэце Мінесоты, атрымаў ступені магістра і доктара.

Ягоная сфера інтарэсаў: фінансавая эканоміка, міжнародныя фінансы, макраэканоміка, аптымальная фіскальная палітыка, дзяржаўная эканоміка.

Тое, што біяграфіі Цывінскага і Голасава падобныя — не супадзенне. У 90-х, будучы школьнікамі на праграме абмену ў Нідэрландах, іх размеркавалі ў адну сям’ю. 

Пасля яны разам вучыліся ў БДЭУ і ў аспірантуры ў Мінесоце. Многія навуковыя працы былі напісаныя імі ў суаўтарстве.

Юрый Церлукевіч (Yuri Tserlukevich)

Ва Універсітэце штата Арызона, на факультэце фінансаў выкладае іншы беларус. Яго навуковыя інтарэсы звязаныя з дынамічнымі мадэлямі паводзін фірмаў, рэальнымі апцыёнамі, уплывам інвестыцыйных варыянтаў на цэны на актывы, структурай капіталу, структурай запазычанасці, аплатай працы супрацоўнікам. 

У Беларусі Юрый скончыў фізфак БДУ. Ён атрымаў ступень магістра ва Універсітэце Мінесоты, а PhD — у Каліфарнійскім універсітэце ў Бёрклі. Эканаміст выкладаў у Ганконгу, Італіі, Расіі, Аўстрыі.

У 2014-м увайшоў у склад кансультатыўнага савета Нацыянальнага банка Рэспублікі Беларусь, дзе даваў кансультацыі ўраду па пытаннях эканамічнай палітыкі.

Анастасія Несвятайлава (Anastasia Nesvetailova)

Выпускніца эканамічнага факультэта БДУ, а цяпер – дырэктарка аддзела макраэканамічнай палітыкі і палітыкі развіцця ў ЮНКТАД (ААН Гандль і Развіццё) і прафесарка міжнароднай палітычнай эканомікі Лонданскага ўніверсітэта City.

З 2015-га па 2016 год Анастасія была членам эканамічнай кансультатыўнай групы пры ценявым канцлеры Вялікабрытаніі. У 2017–2018 гадах яна працавала дарадцай Камісіі па эканамічнай справядлівасці Вялікабрытаніі.

Сфера яе інтарэсаў ахоплівае фінансы і фінансавыя крызісы, глабалізацыю і кіраванне. 

Анастасія — аўтарка шматлікіх акадэмічных артыкулаў і артыкулаў у СМІ аб фінансавых крызісах, стабільнасці і рэгуляванні, а таксама некалькіх кніг.

Апошняя, напісаная ў суаўтарстве ў Ронанам Паланам, “Сабатаж. Бізнэс фінансаў” была выдадзеная ў 2021 годзе сусветна вядомым выдавецтвам Penguin.

Юлія Карасцялёва (Julia Korosteleva)

Юлія Карасцялёва — прафесар эканомікі і бізнэсу ва Універсітэцкім каледжы Лондана (UCL). Яна атрымала доктарскую ступень у галіне эканомікі ва Універсітэце Бата (Вялікабрытанія). У Беларусі Карасцялёва скончыла БДЭУ.

Акрамя навуковых артыкулаў, у сеціве можна знайсці водгукі на ягоныя лекцыі, напрыклад: “Ён клапоціцца пра сваіх вучняў. Ён прыняў мяне ў свой клас, хоць той быў поўны”.

Ігар Ліўшыц (Igor Livshits)

Ігар Ліўшыц — эканамічны дарадца і эканаміст, які спецыялізуецца на пытаннях спажывецкай запазычанасці і банкруцтва, палітычнай эканоміі і чалавечага капіталу ў Федэральным рэзервовым банку Філадэльфіі. Раней быў дацэнтам кафедры эканомікі Універсітэта Заходняга Антарыа.

Будучы ў Беларусі, вывучаў прыкладную матэматыку ў БНТУ. Магістарскую ступень па эканоміцы атрымаў ва Універсітэце Ілінойса, а доктарскую — ва Універсітэце Мінесоты.

Асноўныя вобласці яго даследаванняў: макраэканамічная тэорыя, фінансавыя рынкі, спажывецкія фінансы, палітычная эканоміка, эканамічны рост і развіццё.