Што адбываецца з курсам долара і як ён уплывае на кашалькі беларусаў

04/12/2024 - 15:08

Як павышэнне курсу долара адаб'ецца на беларусах?

Як павышэнне курсу долара адаб'ецца на беларусах? / pexels.com

На мінулым тыдні курс долара ў Беларусі рэзка вырас, пераадолеўшы псіхалагічную адзнаку ў 3,5 рубля. Праз некалькі дзён ён крыху знізіўся, але так і не вярнуўся да ранейшых значэнняў.

Чаму гэта адбылося, шо рабіць беларусам і як скачок курсу паўплывае на іх кашалькі? Пра гэта Еўрарадыё паразмаўляла з эканамісткай Алісай Рыжычэнка.

Чаму долар вырас?

Рост курсу долара ў адносінах да беларускага рубля, на думку эксперткі, з'яўляецца вынікам адразу некалькіх фактараў. Першы з іх — гэта тое, што адбываецца з расійскім рублём.

— Санкцыі, якія ўвялі ЗША супраць расійскіх банкаў, асабліва супраць Газпрамбанка (праз яго праводзіліся плацяжы за нафту і за газ) справакавалі сур'ёзную паніку на валютным рынку. Гэта абясцэніла расійскі рубель да долара.

Мы залежым ад Расіі ў знешнім гандлі, у валютным кошыку Нацбанка Беларусі 60% долі займае расійскі рубель. Гэта моцна адбіваецца на нас.

Другі фактар, чаму долар падскочыў — гэта сезоннасць росту цэн перад новым годам, кажа Аліса Рыжычэнка.

Что происходит с курсом доллара и как он влияет на кошельки белорусов

Як павелічэнне курсу долара паўплывае на беларусаў / pixabay.com

— Людзі перад святамі закупляюцца прадуктамі, падарункамі, бытавой тэхнікай. Такі сезонны фактар, які стымулюе ўнутраны попыт. А калі ён расце, імпарцёры павінны больш прывозіць у Беларусь, а для гэтага трэба больш валюты, каб плаціць за тавары, набытыя за мяжой.

Як гэта адаб'ецца на беларусах?

— Натуральна, калі імпарт становіцца даражэйшым (таму што валюта для нас стала каштаваць больш), то гэта ўсё закладаецца ў кошт тавараў, якія беларусы бачаць на паліцах крамаў.

Акрамя гэтага, кажа эканамістка, у Беларусі ёсць вялікая доля імпарту з Расіі.

— Зараз беларускі рубель застаецца адносна стабільным у адносінах да расійскага рубля. У такой сітуацыі больш выгадна купляць тавары з Расіі, бо праз абясцэньванне расійскага рубля ў адносінах да долара яны становяцца для нас крыху таннейшымі, чым раней. Але ў Расіі зараз назіраецца рэкордная інфляцыя, якая працягвае расці. І гэта нівелюе той эфект, які мог бы зрабіць расійскі імпарт таннейшым для беларусаў.

Адпаведна, гэта наўпрост уплывае на дабрабыт беларусаў — курс павялічваецца, і людзі са свайго заробку могуць сабе дазволіць купляць менш, чым гэта было яшчэ месяц таму.

Аліса Рыжычэнка адзначае, што курс цяпер павялічваецца плаўна. І на яе думку, такое будзе адбывацца да выбараў у студзені 2025 года.

— Што будзе адбывацца пасля выбараў прадказаць вельмі складана і сітуацыя будзе залежаць ад мноства фактараў: ці будзе эскалацыя канфлікту ва Украіне ці, наадварот, будуць мірныя перамовы, якая будзе палітыка ЗША пасля прыходу Трампа на пасаду прэзідэнта.

Ад гэтых фактараў будзе залежаць, куды беларускім уладам накіроўваць сродкі, якія яны маюць.

Улады хочуць астудзіць эканоміку / nvdaily.ru

З прычыны дэфіцыту кадраў людзям плацяць вялікія зарплаты, яны ідуць у крамы, купляюць больш, плюс сталі больш браць спажывецкіх крэдытаў, іпатэчных, што вельмі моцна разагравала ўнутраны попыт.

А гэта прыводзіць да таго, што вытворцы павінны вырабляць больш і, адпаведна, больш закупляць. Гэта значыць попыт на валюту ўсё роўна расце.

Як сябе засцерагчы?

На думку эканамісткі, захоўваць грошы ў замежнай валюце (пажадана ў розных) — самы надзейны спосаб сябе засцерагчы.

— Долар і еўра — гэта адзін з варыянтаў, як можна захаваць свае зберажэнні. Я б не раіла юані, бо трэба дачакацца, якая эканамічная палітыка ЗША будзе ў адносінах да Кітая.