Пасля прыняцця Указа №8 мінскае метро зноў можа загаварыць па-англійску
![Пасля прыняцця Указа №8 мінскае метро зноў можа загаварыць па-англійску](/sites/default/files/styles/gallery_main/public/2023-08/326906.jpg.webp?itok=7SX5LNy4)
На брыфінгу ў Мінску намеснік дырэктара Дэпартамента па турызме Мінспорту Віталь Грыцэвіч паведаміў, што у Міністэрстве спорту чакаюць павелічэння колькасці турыстаў на 20% у сувязі з прыняццем Указа №8. Чыноўнік таксама паведаміў, што найперш чакаецца павелічэнне колькасці турыстаў з Еўропы, Паўночнай Амерыкі і краін Персідскага заліву.
У адказ на пытанне аб тым, што плануе зрабіць Мінспорту для паляпшэння умоваў для замежных турыстаў у Беларусі, Грыцэвіч спаслаўся на вопыт Чэмпіянату свету па хакеі. Верагодна, у мінскім метро зноў з'явяцца аб'явы на англійскай мове, будуць распрацаваныя новыя турыстычныя маршруты па Беларусі і зробленыя іншыя крокі.
Англійская мова ў сталічным метрапалітэне гучала ў траўні 2014 года, калі ў Беларусі праходзіў чэмпіянат свету па хакеі. Праз нейкі час ад гэтай практыкі адмовіліся. Метрапалітэн тады тлумачыў, што аб'явы на дзвюх мовах перашкаджаюць графіку руху цягнікоў.