Праца ФСБ ці маскарад Прыгожына: эксперты пра падзенне борта з босамі "Вагнера"
Яўген Прыгожын / ТАСС
Крушэнне самалёта з Яўгенам Прыгожыным і іншымі кіраўнікамі ПВК "Вагнер" магло быць аперацыяй расійскіх спецслужбаў або пастаноўкай самога Прыгожына, мяркуюць ваенныя эксперты. Расійская прапаганда заяўляе пра ўкраінскую дыверсію.
Даведаліся, пра што кажуць абставіны здарэння.
Выбух знутры ці СПА?
Калі ацэньваць катастрофу з тэхнічнага боку, то версіі можна скараціць да дзвюх: выбухоўка на борце або праца СПА, мяркуе вайсковы экспэрт, кіраўнік Conflict Intelligence Team Руслан Левіеў.
— На відэазапісах, апублікаваных відавочцамі, мы бачым, як самалёт падае. У яго адно крыло ўпала асобна, хвост — асобна. Адпаведна, ён быў разбураны менавіта ў паветры. Самалёты, як правіла, самі ў паветры не развальваюцца. На відэазапісах відавочцы кажуць, што чулі перад гэтым некалькі воплескаў, што характэрна для СПА. Хоць ад выбухоўкі таксама маглі быць такія гукі. Але на некаторых відэазапісах відаць, як я мяркую, інверсійны след, — мяркуючы з усяго, ад ракеты СПА. Гэта значыць, пакуль я схіляюся да версіі з супрацьпаветранай абаронай.
Плюс публікуюць некаторыя скрыншоты з відэазапісаў відавочцаў, якія здымалі абломкі самалёта, якія гараць на зямлі. На некаторых кадрах відаць быццам тыповыя пашкоджанні на крыле самалёта, такія пазнакі ад паражальных элементаў зенітнай кіраванай ракеты. Не гатовы адназначна сказаць, што гэта дакладна яны, але падобныя на іх. Якасць відэа, на жаль, не дазваляе ўсё дакладна ідэнтыфікаваць.
"Ва Украіны шмат іншых клопатаў і мэтаў"
Ваенны эксперт, дырэктар New Geopolitics Research Network Міхаіл Самусь таксама адзначае, што аб'ектыўнай інфармацыі мала, але наўрад ці ў гэтым замяшаная Украіна.
— Было відэа з каментаром жанчыны. Яна сказала пра нейкія два воплескі. Гэта магло быць што заўгодна. Калі гэта быў выбух унутры, далей маглі выбухаць рухавікі або проста быць нейкія гукі, якія маглі быць успрынятыя як выбухі.
З нагоды ўкраінскага следу: думаю, у Расіі хапае сіл і людзей, якія хацелі б дамагчыся такога выніку. Ва Украіны цяпер шмат іншых клопатаў і мэтаў.
Журналіст-расследавальнік, кіраўнік выдання Bellingcat Хрыста Грозеў выключае дыверсію Украіны.
— Калі Украіна магла б гэта зрабіць, яна б зрабіла гэта, калі Прыгожын кіраваў самым эфектыўным падраздзяленнем войскаў Расіі. Цяпер так, ёсць нейкі плюс для Украіны, але нашмат меншы, чым тады.
