Працэс над Пратасевічам часова зрабілі закрытым
Раман Пратасевіч на судзе / sb.by
Суд над Раманам Пратасевічам пяройдзе часова ў закрыты рэжым, паведамляе газета "СБ. Беларусь сегодня". Пра гэта хадайнічала дзяржаўная абвінаваўца.
На гэтым этапе ў судзе будуць даследаваць пісьмовыя матэрыялы справы. У іх, як заявіў бок абвінавачання, змяшчаюцца "не толькі экстрэмісцкія публікацыі, але і матэрыялы, якія складаюць дзяржаўную тайну".
Перад гэтым у судзе адбыўся допыт самога Пратасевіча, а таксама сведкі — блогера Максіма Пушкіна. Таксама ў судзе зачыталі паказанні Ігара Кабушкова — адміністратара тг-канала "Адлічана", які на суд не з'явіўся, бо з'ехаў у Польшчу.
Як распавядала Еўрарадыё, 16 лютага ў Мінскім абласным судзе пачаўся разгляд крымінальнай справы заснавальнікаў тэлеграм-канала NEXTA. На судзе прысутнічае толькі Раман Пратасевіч, яшчэ два абвінавачаныя — Сцяпан Пуціла і Ян Рудзік — знаходзяцца за мяжой, іх судзяць завочна.
