П'яны кіроўца з адкруткай у руках напаў на інспектара ДАІ
![П'яны кіроўца з адкруткай напаў на даішнікаў / кадр з відэа](/sites/default/files/styles/gallery_main/public/2023-08/liachaviczy-0811.jpg.webp?itok=dg_XN0sA)
П'яны кіроўца з адкруткай напаў на даішнікаў / кадр з відэа
У аграгарадку Нача Ляхавіцкага раёна п'яны кіроўца напаў на інспектараў ДАІ, пагражаючы адкруткай. Як паведамляе тг-канал "Обратная сторона", здарэнне адбылося 2 лістапада.
Міліцыянты спынілі "Мазду". А кіроўца, выйшаўшы з машыны, адразу пачаў ім пагражаць адкруткай. Пры гэтым мужчына некалькі разоў спрабаваў ударыць ёй афіцэраў і ўцячы.
Пасля затрымання выявілася, што ў 55-гадовага мясцовага жыхара было 1,5 праміле алкаголю.
Адзін з даішнікаў ужо чатыры разы лавіў вяскоўца за п'янае кіраванне аўтамабілем. Апошнім разам той пагражаў міліцыянту расправай у выпадку чарговага затрымання.
На кіроўцу пачалі крымінальную справу за гвалт у дачыненні да міліцыянтаў і склалі пратаколы за п'яную язду без правоў. Яму пагражае да сямі гадоў калоніі. Мужчыну пасадзілі ў ізалятар часовага ўтрымання.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.