Расійскія дыпламаты сустрэнуцца з Баўмгертнерам
Следчы камітэт дазволіў прадстаўнікам расійскай амбасады сустрэцца з гендырэктарам "Уралкалія", які знаходзіцца пад хатнім арыштам.
Пра гэта са спасылкай на консула амбасады Расіі Ігара Карагіна піша БелаПАН.
"Дазвол атрыманы. Дакладны час наведвання неабходна ўзгадніць са Следчым камітэтам. Калі канкрэтна адбудзецца сустрэча , пакуль сказаць не магу", — адзначыў дыпламат.
Нагадаем, гендырэктар “Уралкалія” Уладзіслаў Баўмгертнер затрыманы 26 жніўня ў Мінску, куды прыехаў па запрашэнні прэм’ера Міхаіла Мясніковіча. Арышту папярэднічала адмова расійскага прадпрыемства ад супрацоўніцтва з " Беларускай калійнай кампаніяй" — трэйдарам, што аб'ядноўваў "Уралкалій" і "Беларуськалій".
Увечары 29 жніўня Баўмгертнеру прад'яўленае абвінавачванне ў злоўжыванні ўладай і службовымі паўнамоцтвамі. Яму пагражае да 10 гадоў пазбаўлення волі з канфіскацыяй маёмасці. Следчы камітэт паведаміў, што шкода па справе “Беларускай калійнай кампаніі” ацэньваецца ў 100 мільёнаў долараў.
Роўна месяц Уладзіслаў Баўмгертнер знаходзіўся ў следчым ізалятары КДБ. 26 верасня, пасля візіту ў Мінск генпракурора Расіі Юрыя Чайкі топ-мэнэджара перавялі пад хатні арышт.
