Беларусь адмовіла Кыргызстану ў выдачы Жаныбека Бакіева
Адмова, нібыта, была зробленая яшчэ ў чэрвені, да таго, як у інтэрнэце з'явіліся фотаздымкі Бакіева ў цэнтры Мінска.
Як паведамляе БелаПАН, Генпракуратура нашай краіны спаслалася на Канвенцыю аб прававой дапамозе і прававых адносінах па грамадзянскіх, сямейных і крымінальных справах. Беларускія пракуроры мяркуюць, што Жаныбека Бакіева пераследуюць па палітычных перакананнях. Па словах чыноўнікаў Генпракуратуры, яны паведамілі афіцыйнаму Бішкеку гэтую сваю пазіцыю яшчэ ў чэрвені.
Між тым, яшчэ на пачатку жніўня прадстаўнікі МУС Кыргызстана сцвярджалі, што не маюць афіцыйнага адказу з Беларусі.
Нагадаем, што беларускі актывіст Міхаіл Пашкевіч выпадкова сфатаграфаваў Жаныбека Бакіева, яго целаахоўніка Рустама Сайдуева і былога намесніка Тахіра Рысаліева ў цэнтры Мінска некалькі тыдняў таму. Усіх іх шукаюць у Кыргызстане па абвінавачанні ў забойствах ды іншых злачынствах. Паколькі беларускія ўлады не адрэагавалі на вусны запыт Кыргызстана, 24 жніўня з Мінску быў адкліканы амбасадар гэтай краіны.
Фота: focus.kg
