Раманчук, Саннікаў і Някляеў вызначаць супольныя патрабаванні да дэбатаў

Белтэлерадыёкампанія заявіла пра намер зладзіць перадвыбарныя тэледэбаты.

"Дэбаты адбудуцца, бо гэта адпавядае заканадаўству. Зараз мы распрацоўваем наш унутраны парадак, каб забяспечыць іх рэалізацыю на належным узроўні", — сказаў намстаршыні кампаніі Аляксандр Саламаха.

Правілы, паводле якіх будуць праводзіцца тэледэбаты, пакуль што не вызначаныя. У прыёмнай старшыні БТРК Аляксандра Зімоўскага нам паведамілі: каментаваць пакуль што няма чаго:

"Аляксандр Леанідавіч сказаў, што пакуль што няма плану правядзення дэбатаў, таму ніякага каментару ён пакуль даць не можа. І параіў звярнуцца ў Цэнтрвыбаркам".

Сакратар ЦВК Мікалай Лазавік распавёў Еўрарадыё, што ніякага пратакола, паводле якога ў Беларусі маглі б быць праведзеныя тэледэбаты, няма:

"Як будуць праходзіць тэледэбаты — гэта пакуль Зімоўскі выказваў сваё ўласнае меркаванне. Рашэнне ж прымае ЦВК. І ў канчатковым варыянце можа быць і так, і крыху па-іншаму. А можа і добра адрознівацца ад гэтай прапановы".

Па словах старшыні ЦВК Лідзіі Ярмошынай, найбольш верагодна, што тэледэбаты будуць весціся цягам гадзіны. Удзельнічаць у іх будуць не два, а больш кандыдатаў, а дзея будзе падобнае да бліц-апытанкі падчас якой "кандыдаты змогуць выкласці свае погляды на самыя галоўныя пытанні быцця і жыцця краіны".

Меркаваныя ўдзельнікі тэледэбатаў ставяцца да гэтага праекта неадназначна. І, з большага, насцярожана:

"Аказваецца, яны збіраюцца ладзіць тэледэбаты ў запісе, — разважае Ўладзімір Някляеў. — А ў такім выпадку галоўным героем будзе выступаць не кандыдат ці хто-небудзь іншы, нават не Пракопаў [вядучы Першага нацыянальнага канала і меркаваны мадэратар тэледэбатаў. — Заўв. Еўрарадыё], а мантаж!"

"Можна так змантаваць праграму, што потым сам сябе не пазнаеш, — па дарозе на пікет дзеліцца з Еўрарадыё досведам Яраслаў Раманчук. — У 2006 годзе я быў у тэледэбатах, прадстаўляў адзінага кандыдата. І тады ў студыі ішла адна размова, а тое, што мы пабачылі па БТ, была зусім іншая рэч!"

Таму Яраслаў Раманчук на тэледэбаты ў запісе, хутчэй за ўсё, не пагодзіцца. Але Ўладзімір Някляеў лічыць, што падставаў для настолькі катэгарычнай пазіцыі няма:

"Я патэлефанаваў іншым кандыдатам: Саннікаву, Раманчуку. І прапанаваў ім зрабіць сумесную заяву: трэба ўлічваць нашыя меркаванні таксама. І гэта можа быць толькі ў жывым эфіры, каб не было ніякага скажэння. Людзі павінны бачыць усё ў рэальнасці — бачыць, з кім яны маюць справу, што кандыдат гаворыць, як ён гэта гаворыць, у якіх сітуацыях ён гэта гаворыць. А не пасля маніпуляцыі тэлетэхнічнымі сродкамі".

Падыходзіць сп. Някляеву і варыянт з перадпраглядам матэрыялу дэбатаў і ўзгадненнем выніковай "карцінкі". А вось Рыгор Кастусёў пойдзе на тэледэбаты ў кожным выпадку, нават калі яны будуць у запісе:

"Калі іншага варыянта не будзе, давядзецца ісці на гэта".

Калі на Першым нацыянальным не прыдумаюць нічога вар'яцкага, возьме ўдзел у тэледэбатах і Віталь Рымашэўскі:

"Сэнсу адмаўляцца ад дэбатаў я на сённяшні дзень не бачу ніякага. Пытанне, вядома, у форме, якую абярэ для іх нашае тэлебачанне. Безумоўна, яна можа быць і абсалютна непрымальная. Але гэта пакажа час. А пакуль я не бачу падстаў адмаўляцца".

Рыгор Кастусёў спадзяецца, што ў тэлевізіёншчыкаў хопіць смеласці запрасіць яго. А таксама мяркуе, што тэледэбаты праігнаруе "кандыдат №1": "Пабаіцца".

Малюнак: Мікалай Круцікаў.