Сяргей Шнураў стаў партыйным і ідзе на выбары

Лідар расійскага гурта "Ленінград" Сяргей Шнураў збіраецца ў наступным годзе балатавацца ў Дзярждуму РФ. Пра гэта было заяўлена ў Пецярбургу на нарадзе актыву Партыі росту. Шнураў стаў членам гэтай партыі.

"Жыццё маё павярнула такім дзіўным паваротам, памаячыла мне ў выглядзе Партыі росту, — гаварыў музыкант у сваёй кароткай прамове. — Мне здаецца, што я вам спатрэблюся. Цалкам дакладна, па меншай меры, дадам яркіх фарбаў, буду называць рэчы сваімі імёнамі... Са мной будзе відавочна весялей".

Сяргею Шнураву 46 гадоў. Дагэтуль ён ніякага ўдзелу ў палітыцы не прымаў, а галасаваць на выбары хадзіў толькі адзін раз у жыцці. Аднак палітыка нярэдка адлюстроўвалася ў песнях "Ленінграда".

"Партыя росту" — усерасійская, ліберальна-кансерватыўная, яна мае афіцыйную рэгістрацыю. Партыя існуе ўжо чатыры гады, яе лідар — Барыс Цітоў. Сайт meduza.io раней пісаў, што ў Адміністрацыі прэзідэнта Расіі разглядаліся сцэнары стварэння ілюзіі канкурэнцыі на выбарах у Дзярждуму праз уключэнне ў палітычную барацьбу "каля дзясятка новых партый". А сярод новых апазіцыйных лідараў там пабачылі Сяргея Шнурава.

"Роля адміністрацыі прэзідэнта моцна перабольшаная", — кажа музыка.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.