Сыну пісьменніка Антонава прысудзілі 1,5 года калоніі
Калонія, ілюстрацыйнае фота / pixabay.com
1 год і 6 месяцаў калоніі агульнага рэжыму прысудзілі Арцёму Антонаву — сыну пісьменніка Сяргея Антонава, аўтара кніг з серыі "Метро 2033". Хлопца прызналі вінаватым у "абразе Лукашэнкі", пішуць праваабаронцы з Mayday.
Прысуд Арцёму вынес 19 красавіка суддзя Быхаўскага раёна Уладзімір Жолудзеў. Падрабязнасцяў справы няма.
Як распавядала Еўрарадыё, Арцёма Антонава затрымалі ў сярэдзіне снежня 2023 года ў Быхаве. Спачатку на яго пачалі адміністрацыйную справу, правялі дома ператрус і канфіскавалі тэхніку. Пасля гэтага Арцёма абвінавацілі ў "абразе Лукашэнкі". Праваабаронцы прызналі яго палітвязнем.
Перад гэтым сілавікі пачалі пераслед ягонага бацькі — Сяргея Антонава. Пад пагрозай крымінальнай справы за супрацоўніцтва з сайтамі 6TV і "Магілёў медыя" ён быў вымушаны пакінуць Беларусь.
