Тэрэза Мэй сыйдзе ў адстаўку, калі прымуць яе версію брэкзіту
Прэм'ер-міністр Вялікабрытаніі Тэрэза Мэй паабяцала датэрмінова сысці ў адстаўку, калі будзе прынятая яе версія па выхадзе краіны з Еўрасаюза. Пра гэта паведаміла канцылярыя Мэй, піша "Новая газета".
"Я прашу ўсіх у гэтай зале падтрымаць здзелку [з Еўрасаюзам] для таго, каб мы выканалі наш гістарычны абавязак — ажыццявілі рашэнне брытанскага народа і пакінулі Еўрапейскі саюз у арганізаванай манеры без лішніх ускладненняў", — заявіла брытанскі прэм'ер.
Брэкзіт мусіў адбыцца 29 сакавіка. Цяпер парламент Вялікабрытаніі разглядае альтэрнатыўныя варыянты выхаду. Па просьбе Мэй Еўрасавет адклаў пачатак выхаду краіны з ЕС да 22 траўня.
Раней парламент Вялікабрытаніі ўжо адхіліў два праекты брэкзіту, якія прапанавала Мэй. Таксама парламентары выступілі супраць выхаду з ЕС без здзелкі.
23 сакавіка ў Лондане адбыўся масавы мітынг за паўторны рэферэндум наконт брэкзіту. Паводле ацэнак арганізатараў, на яго выйшла больш за мільён чалавек.
