У Азаронка і Гладкай могуць з'явіцца целаахоўнікі
Грыгорый Азаронак ў ізалятары на Акрэсціна / скрын з дзяржТВ
У Грыгорыя Азаронка, Людмілы Гладкай, Андрэя Мукавозчыка, іншых прапагандыстаў а таксама сілавікоў могуць з'явіцца целаахоўнікі. Гэта здарыцца, калі будзе прынята новая рэдакцыя закона "Аб дзяржаўнай абароне". Пра такую магчымасць у эфіры дзяржТВ заявіў намеснік дзяржсакратара Савета бяспекі Аляксандр Рахманаў.
"На гэтых людзей таксама будуць распаўсюджвацца ва ўстаноўленым парадку па рашэнні міністра ўнутраных спраў дадатковыя меры абароны, якія дазволяць зберагчы і іх здароўе, і іх жыццё, і іх маёмасць ад любых злачынных замахаў. Даволі шырокі спектр гэтых мерапрыемстваў прадугледжаны ў законе" Аб дзяржаўнай абароне" пачынаючы ад фізічнай абароны і аж да легендавання іх дадзеных і нават прадугледжана такая норма — змена знешнасці", — распавёў Рахманаў.
На дадзены момант закон аб дзяржабароне абараняе суддзяў, службовых асоб праваахоўных і кантралюючых (наглядных) органаў, супрацоўнікаў органаў дзяржаўнай аховы і іх блізкіх.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
