У Беларусь забаранілі ўвозіць мухаморы

У Беларусі забаранілі мухаморы. Адпаведную пастанову прыняло Мінздароўя.

Згодна з ёй забараняецца ўвоз, продаж, захоўванне, перавозка і выкарыстанне прадукцыі, якая змяшчае мухаморы. Падпісаў дакумент 16 жніўня галоўны санітарны лекар Аляксандр Тарасенка.

Цяпер мухамораў у продажу ў любым выглядзе быць не павінна. Рэшткі тавару належыць вярнуць вытворцу ці ўтылізаваць. Гаворка вядзецца пра настойкі з мухаморам, харчовыя дабаўкі і г.д.

У Мінздароўя тлумачаць, што апошнім часам у Беларусі пачасціліся выпадкі атручвання гэтымі грыбамі. "На сённяшні дзень няма ніводнага навуковага доказу пра станоўчы ўплыў мухамораў, уключаючы мікрадозы, на арганізм чалавека", — кажуць у міністэрстве.