У Брэсце асуджаны вясковец, які вывез у багажніку дзяўчыну і збіў яе бітай

У Брэсце асуджаны 29-гадовы жыхар вёскі Дзівін Кобрынскага раёна Яўген Канавальчук, які вывез з горада ў багажніку аўтамабіля дзяўчыну і збіў яе бітай. Здарэнне адбылося раніцай 30 верасня мінулага года. Выпадковы сведка, дворнік, паведаміў у міліцыю, што бачыў у двары аднаго з дамоў выкраданне дзяўчыны, якую малады чалавек паклаў у багажнік Volkswagen Jetta. Ён стаў перад машынай, але кіроўцу гэта не спыніла — ён з'ехаў.

На тэрыторыі Жабінкаўскага, Кобрынскага і Бярозаўскага раёнаў аб'явілі план "Перахоп". Неўзабаве ў міліцыю патэлефанавала 22-гадовая Елізавета Сміховіч, якая распавяла, што знаходзіцца ў багажніку легкавіка, якім кіруе яе былы хлопец. Куды ён едзе, яна не ведала.

У вёсцы Бусні Жабінкаўскага раёна дзяўчына паспрабавала ўцячы. Канавальчук яе дагнаў і двойчы ўдарыў бітай па галаве. Сміховіч аднак заскочыла ў кабіну трактара, які праязджаў міма, і такім чынам уратавалася ад зламысніка. Неўзабаве ў вёску прыехалі міліцыянеры, мужчыну затрымалі.

Крымінальную справу разглядаў суд Маскоўскага раёна Брэста. Высветлілася, што Яўген Канавальчук і Елізавета Сміховіч сустракаліся больш за тры гады, але пасля развіталіся. Мяркуецца, што на выкраданне мужчына пайшоў, спрабуючы вярнуць дзяўчыну. "Прабачце мяне, што пайшоў не па той дарозе", — сказаў ён у судзе.

Вяскоўца прызналі вінаватым у выкраданні чалавека, наўмысным нанясенні цяжкага цялеснага пашкоджання, а таксама гвалце ў дачыненні да асобы, якая выконвае грамадскі абавязак. Ён быў асуджаны на 11 гадоў калоніі ўзмоцненага рэжыму. У мужчыны канфіскуюць аўтамабіль, таксама ён мусіць заплаціць штраф — 4050 рублёў. Прысуд яшчэ можа быць абскарджаны, інфармуе sb.by.