У Бруселі адбыўся выбух каля інстытута крыміналогіі
Каля Брусельскага інстытута крыміналогіі адбыўся выбух, перадае Бі-Бі-Сі. Паводле папярэдніх звестак, ахвяраў і пацярпелых няма.
Бельгійскія СМІ інфармуюць, што здарэнне адбылося каля 2.30 паводле мясцовага часу. Праз агароджу інстытута прарваўся аўтамабіль, пасля чаго нападнікі ўзарвалі бомбу каля лабараторый.
На шчасце, на момант выбуху ў будынку інстытута нікога не было.
У Бельгіі працягвае дзейнічаць рэжым павышанай тэрарыстычнай пагрозы. Ён быў уведзены некалькі месяцаў таму пасля тэрактаў у аэрапорце і метро Бруселя. Тады загінулі больш за 30 чалавек.
